Foto: Kursiv.kz
Sybailas jemqorlyqqa qarsy qyzmet Abai oblysynda "Satyp alýdyń biryńǵai terezesi" arqyly memlekettik satyp alý qunyn jasandy túrde ósirý derekterin anyqtady, - dep habarlaidy Tengrinews.kz portaly.
Keiingi úsh aida oblysta 453 million teńgege satyp alý qunyn jasandy túrde ósirý deregi anyqtalǵan.
"Qyrkúiektiń aiaǵynda "Teplokommýnenergo" MKK ysyrmalardyń ár danasyn 1.2 million teńgeden satyp alýǵa yqpal jasaǵan. Satyp alý josparyna sáikes, ysyrmalardyń sany 130 birlik, al jalpy somasy 161 million teńge. Alaida, bul ónimniń naryqtaǵy maksimal quny 845 myń teńgeden aspaidy.
Antikordyń áreketinen keiin kommýnaldyq kásiporynnyń satyp alý josparyna tiisti túzetýler engizildi. Nátijesinde kásiporyn biýdjeti 51 million teńgeni únemdep, satyp alynatyn ónim sanyn 150 birlikke deiin ulǵaitqan", - delingen habarlamada.
Memlekettik kásiporyndardyń tarapynan da qyzmetterdi negizsiz satyp alýǵa jol berilip kelgen.
"Mysaly, "Shúlbi GES" JShS "KTS boiynsha deklaratsiia jasaý jáne biýdjetke salyqtar men tólemderdi esepteýdiń durystyǵyn tekserý" qyzmetin satyp alýdy josparlaǵan. Bul qyzmetke atalǵan kvazimemlekettik sektorda 1.7 million teńge qarastyryp qoiǵan. Bul rette, uiymnyń salyq eseptiligin daiyndap, tapsyrýǵa mindetti shtattyq qyzmetker-esepshi bar bolǵan. Atalǵan satyp alýdyń da kúshi joiyldy", - delingen habarlamada.
Sondai-aq, memlekettik organdardy materialdyq-tehnikalyq qamtamasyz etýdiń zattai normasynda kózdelmegen taýarlardy satyp alýǵa konkýrstardy jariialaý derekteri anyqtalǵan. Mundai satyp alýdyń kúshi "Balalar men jastardyń shyǵarmashylyq saraiy" KMQK-men joiylǵan, onda 320 myń teńgege kofemashinasyn satyp alý josparlanǵan.
"2022 jyldyń jeltoqsanynda biýdjet qarajatyn igerý maqsatynda, Aiagóz aýdanynyń ákimdigi 216 million teńge somasyna 27 birlik qyzmettik avtokólik satyp alýdy josparlaǵan. Alaida, bir kóliktiń (Chevrolet Cobalt) quny 1.5 million teńgege asyra baǵalanǵan. Satyp alý qunyn qaita qaraý týraly joldanǵan usynys hattan keiin ákimdik 216 million teńgege avtokólik quraldaryn satyp alýdan múldem bas tartqan.", - delingen habarlamada.
