Jaldamaly qyzmetker aqysyz demalysqa shyqpai 42 500 teńge alsa zańsyz bolyp eseptelinedi. Bul týraly búgin Ortalyq kommýnikatsiialar qyzmetindegi brifingide QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Jaldamaly jumys istep júrgen qyzmetkerler 42 500 teńgeni jumys berýshileri májbúrli túrde aqysyz demalysqa jibergen bolsa ǵana ala alady. Basqa jaǵdaida 42 500 teńgeni alýǵa bolmaidy. Ony biz osy kúnge deiin túsindirip keldik. Eger jumystan shyǵyp ketse, oǵan jumysynan aiyrylýyna bailanysty 6 aiǵa deiin tólenetin basqa tólem bar. Ol úshin resmi jumyssyz retinde tirkelýi ǵana jetkilikti», - dedi ministr.
Osy rette ol aqysyz demalysqa shyqpasa da 42 500 teńge mólsherindegi áleýmettik tólem alyp jatqan jaldamaly qyzmetkerlerdiń anyqtalyp jatqandyǵyn aitty. Onyń túsindirýinshe, áleýmettik tólem berý erejesi ázirlengen kezde jumys berýshilerge ózderiniń jumysshylaryn aqysyz demalysqa jbergeni jóninde buiryqtaryn tirkeý nemese banktik esepshottarynda aqshalarynyń joqtyǵyn dáleldep qujat usyný talaby bolǵan. Biraq, qoǵamnyń talabymen, halyqtyń aitýymen Eńbek ministrligi mundai talapty alyp tastap, habarlandyrý tártibine kóshken.
«Sóitip ótinish bergen kezde tótenshe jaǵdaiǵa bailanysty tabysynan aiyrylǵanyn kórsetý qajet boldy. Biz ol ótinishke senip tólem jasadyq. Biraq, tártip bolýy kerek. Eger zańda, bizdiń túsindirmelerimizde tek aqysyz demalysqa ketken kezde tólenedi delinse, onda ol tártipti saqtaý kerek. Sonyqtan taǵy da aitamyn, jeke tulǵalarǵa, jeke kásipkerlikterge, ózi betinshe resmi ne beiresmi jumys istep júrgenderge qatysty esh problema joq. Ýaiymdamańyzdar, eshqandai aqsha qaitarý, ne tekserý, tergeý bolmaidy. Al jumys berýshileri májbúrli aqysyz demalysqa shyǵarmai turaqty jumysy júrip, turaqty jalaqy alyp júrgenderdiń áreketi zań buzýshylyqqa alyp keledi. Ol durys emes», - dedi Eńbek ministri.
Birjan Nurymbetovtyń aitýynsha, 42 500 teńge áleýmettik tólemi Memlekettik saqtandyrý qorynan tólenip jatyr. Dál osy qor zeitaqylar men járdemaqylardy, 1 jasqa deiingi bala kútimine qatysty beriletin járdemaqylardy tólep keledi. Sondyqtan bul qor 42 500 teńge áleýmettik tólemdi zańsyz alǵandardan qarajatty qaitarýdy talap etedi.
«Memlekettik saqtandyrý qory qarajatqa jaýapty bolǵannan keiin aqysyz demalysqa jiberilmegenderge suraý jiberip, aqshany qaitarýdy talap etedi. Sondyqtan taǵy qaitalap aitamyn, tek qana jaldama qyzmetkerler aqysyz demalysqa shyqpaǵandarǵa suraq bar. Olar zańsyz alǵan», - dedi ol.
