Mańǵystaý oblysy Mańǵystaý aýdanynyń ákimi bolyp biyl isti bolǵan Ǵalymjan Niiazov taǵaiyndaldy, dep habarlaidy Ulysmedia.kz.
16 qyrkúiekte Mańǵystaý oblysynyń ákimi Nurlan Noǵaev depýtattarǵa óz erkimen jumystan bosatýǵa ótinish bergen Tilek Kóshmaǵambetovtiń ornyna jańa aýdan ákimniń kandidatýrasyn usyndy.
Ákim laýazymyna kandidat Ǵalymjan Niiazov boldy, onyń kandidatýrasy QR Prezidenti Ákimshiligimen kelisildi.
Ǵalymjan Niiazov Q.Sátpaev atyndaǵy Qazaq ulttyq politehnikalyq ýniversitetin "Poligrafiialyq mashinalar jáne avtomattandyrylǵan keshender" mamandyǵy boiynsha, sondai-aq Sh.Esenov atyndaǵy Aqtaý memlekettik ýniversitetin "Ónerkásiptik, azamattyq qurylys jáne qala sharýashylyǵy" mamandyǵy boiynsha bitirgen.
Bir qyzyǵy, biyl aqpanda Ǵalymjan Niiazov qyzmet babyn asyra paidalandy degen kúdikpen qamaýǵa alynǵan bolatyn.
"QR Qarjy monitoringi agenttiginiń Mańǵystaý oblysy boiynsha aýmaqtyq departamenti sotqa deiingi tergeý aiasynda óńir ákiminiń orynbasary Ǵalymjan Niiazovty aýyr zardaptarǵa ákep soqqan laýazymdyq ókilettikterin asyra paidalandy degen kúdikpen ustady", - dep habarlaǵan vedomstvo.
Keiin sheneýniktiń jazasy úiqamaqqa aýystyrylǵany, mamyr aiynda Mańǵystaý oblysy ákiminiń orynbasary jumysqa shyqqany belgili boldy.
