Búgin Qazaq ulttyq qyzdar pedagogikalyq ýniversitetiniń qurylǵanyna 75 jyl toldy, dep habarlaidy "Ult aqparat".
«Irgeli bilim ordasy osydan 75 jyl buryn, iaǵni 1944 jylǵy 15 tamyzda QazKSR Halyq Komissarlar Keńesiniń qazaq qyzdarynan joǵary dárejeli mamandar daiarlaý týraly №457 qaýlysy negizinde institýt bolyp ashyldy.
Sol jyldyń qyrkúiek aiynda institýtta fizika-matematika, til-ádebiet jáne tarih fakýltetteri ashylyp, 100 stýdent oqýǵa qabyldandy. 1944 jyly institýttyń úsh fakýltetinde qyzmet etken eń alǵashqy 20 oqytýshynyń beseýi ǵylym kandidaty, segizi aǵa oqytýshy jáne jeteýi oqytýshy boldy. Elimizdiń shalǵai aýdandaryndaǵy qyz balalaryn joǵary bilim alýǵa tartý, olardy rýhani biik, parasatty, bilikti mamandar etip tárbieleý arqyly áleýmettik máselelerdi sheshý maqsatymen ashylǵan bilim uiasynyń bul kezeńi el tarihynyń eleýli, qiyn da surapyl ekinshi dúniejúzilik soǵys kezimen tuspa-tus keldi», - dedi oqý ornynyń resmi ókili – baspasóz qyzmetiniń jetekshisi Jandar Asan.
Qara shańyraqtyń ashylýyna Qanysh Sátbaev, Muhtar Áýezov, Sábit Muqanov, Ǵabit Músirepov, Iliias Omarov, Jumabai Shaiahmetov, Nurtas Ońdasynov, Álkei Marǵulan, Nyǵmet Saýranbaev, Qajym Jumaliev, Ahmet Jubanov syndy ultymyzdyń dańqty perzentteri úlken qoldaý kórsetip, «Táńir jazsa bul institýt qazirgi jáne bolashaqtaǵy qazaq qyzdarynyń úlken shamshyraǵy bolady. Osy shamshyraqtyń jaryq sáýlesi eshqashan sónbesin» degen aqjoltai tilegin bildirgen.
Elimizdiń damýyna zor úles qosyp kele jatqan oqý orny búginde Qazaqstannyń joǵary bilikti kadrlar daiarlaityn negizgi ortalyǵynyń birine ainalyp otyr. Elimizdegi bilikti mamandar men talantty ǵalymdardyń, daryndy ustazdardyń úlken toby osy kieli shańyraqtan shyńdalyp shyǵyp, Otanymyzdyń ósip-órkendeýi jolynda jemisti eńbek etip jatyr. Ýniversitettiń 75 jyldyq tól tarihynda oqý ornyn 60 myńnan astam túlek bitirdi.
«Nursultan Nazarbaev ýniversitetke kelgen saparynda: «Bir qyzdy tárbieleý – bir ultty tárbieleýmen birdei» dep atap ótken bolatyn. Qazaq ulttyq qyzdar pedagogikalyq ýniversitetiniń basty maqsaty – bilikti, joǵary moraldi jáne kásibi qasietterdi ielengen tulǵalar daiarlaý. Ordaly oqý ornynyń ujymy búginde osy qundylyqtarǵa súiene otyryp jumys jasaýda», – dedi Jandar Asan.
