Foto: ©️ Tengrinews.kz / Turar Qazanǵapov
Aqtóbe oblysynyń ákimi Eraly Toǵjanovqa aqtóbelikterdiń Qytaimen vizasyz rejimge qatysty alańdaýshylyǵy týraly suraq qoiyldy, - dep habarlaidy Tengrinews.kz.
"Qazir qoǵam Qytaimen vizasyz rejim máselesin talqylap jatyr. Ásirese Aqtóbede bul máseleni qyzý talqylap jatyr, óitkeni ol jaqta qytailyq zaýyttar bar, tipti bir kezderi Qytai konsýldyǵy ashylmaq bolǵan. Turǵyndar alańdap otyr, 17 mamyrda miting ótkizbek boldy, biraq ruqsat berilmedi. Bul týraly ne aita alasyz?", - dep surady jýrnalist brifingte.
"Bul - jii kóteriletin suraq. Bul - azamattardyń qarym-qatynasyna jaqsy múmkindik. Biz XVII ǵasyrda, XVIII ǵasyrda, búginde qalai aralasamyz, solai aralasa beremiz. Bul mańyzdy máselelerdiń biri sanalady.
Biraq bir mańyzdy jaitty atap ótkim keledi, bul viza tek týristik jáne is-saparlarǵa jaramdy, basqa jaǵdailarda ruqsat bolmaidy", - dedi ákim.
Toǵjanov Qytaimen memlekettik shekara tolyq baqylaýda ekenin atap ótti.
"Bizde Aqtóbe oblysynda 598 qytailyq jumys isteidi, olar qashan keledi, qashan ketedi - munyń barlyǵy tolyq baqylaýda. Árine, bul másele SIM-niń úilestirýinde, únemi jumys júrgizilip otyrady. Sondyqtan bul másele oblys turǵyndaryn da, elimizdi de alańdatýǵa turatyn suraq emes. Biz aralasyp, ómir súrip, barlyq jaǵdaidy jasaýymyz kerek", - dep túiindedi sózin aimaq basshysy.
Eske salaiyq, biyl sáýirde Qazaqstan men Qytai úkimetteri óz azamattary úshin eki baǵytta da vizasyz rejim engizýdi josparlap otyrǵany belgili boldy. Tiisti qaýly jobasyn Syrtqy ister ministrligi daiyndady.
Keiin Qytaidyń Qazaqstandaǵy tótenshe jáne ókiletti elshisi Chjan Siao Qytaimen ózara vizasyz rejim engizý josparlary týraly jáne bul másele biyl sheshilýi múmkin ekenin aitty.
