Qytaimen shekaradaǵy ótkizý beketterinde 12,5 myńnan astam avtokólik elektrondy kezekte tur, dep habarlady memlekettik kirister komiteti.
Kólik kompaniialarynyń ókilderi bul máseleni Almatyda bolǵan qańtardaǵy oqiǵalar ýshyqtyryp jibergenin málimdedi. Biznes ókilderi Bas prokýratýra bastaǵan ýákiletti organdar júrgizetin keshendi tekserýdiń nátijelerin kútip otyr, dep jazady Sputnik Qazaqstan agenttigi 24.kz arnasyna silteme jasap.
Biznes qoǵamdastyqtyń ókili Oksana Sorokinanyń aitýynsha, tártipsizdikterge bailanysty tólemder men aýdarymdarǵa kem degende eki apta ýaqyt ketti, al keibireý sol úshin aiyppul tóleidi. Almaty áýejaiyna jasalǵan shabýyldan keiin júk áýe qatynasy áli tolyq qalpyna kelgen joq. Bul da tolyqqandy jumysqa kedergi keltirip otyr. Qazaqstan men Qytai arasyndaǵy logistikadaǵy qazirgi jaǵdaidy Sorokina uzaq jáne qymbat dep baǵalady.
Dostyq jáne Altynkól stantsiialarynda Eýropaǵa tranzittik poiyzdarǵa airyqsha basymdyq berilgen. Keshe ǵana osy eki stantsiianyń basshylary qyzmetinen bosatylǵany belgili boldy. Bul týraly QTJ habarlady.
"Qorǵas" arnaiy ekonomikalyq aimaǵyndaǵy Nur joly, Altynkól jáne qurǵaq porttyń avtomobil ótkizý beketterin qarjy ministri Erulan Jamaýbaev tekserdi. Ministr kásipkerlerge shekaradaǵy jumys tártibi túbegeili qaita qaralyp, kez kelgen zańsyz is-árekettiń toqtatylatynyna ýáde berdi. Sondai-aq vedomstvonyń málimetinshe, bir kúndik firmalar, jalǵan deklaratsiialaý faktileri jáne keden zańnamasyn basqa da zań buzýshylyqtar tekserilip jatyr.
"Kedendik statistikadaǵy alshaqtyq deńgeii memleket pen biznestiń úilesimdi jumysynyń qorytyndy indikatory bolady. Kedenniń qyzmeti ashyq bolýǵa jáne eń bastysy biýdjetke túsetin túsimderdiń tolyqtyǵyn qamtamasyz etýge tiis", - dep atap ótti qarjy ministri Erulan Jamaýbaev.
Aita keteri, 2020 jáne 2021 jyly importtyq jáne eksporttyq taýarlary bar konteinerler QHR shekarasynda birneshe ai boiy turyp qalǵan. Tasymaldaý tarifteri joǵary, kásipkerler shyǵyny milliardpen esepteledi. Keshendi tekserýler bastalǵanǵa deiin ýákiletti organdar jaǵdaidy qytai tarapyndaǵy shekteýlermen bailanystyrdy. Biraq bizneske kedergi Qazaqstan taraptynan da bar.
