Petropavlda oblys ákimi Erik Sultanov QHR Shandýn provintsiiasynyń Liaochen qalasynan kelgen delegatsiiamen kezdesti. Aspan asty eliniń ókilderi aýyl sharýashylyǵy salasynda yntymaqtastyq ornatýdy josparlap otyr, dep habarlaidy BNews.kz.
Qonaqtardy qarsy alǵan Erik Sultanov aimaqtyń ekonomikalyq damýy, investitsiialyq potentsialy jáne olardyń kompaniialarymen seriktestigi týraly aitty.
«Qytailyq kompaniia zaýyt salýdy bastady. Josparda taǵy jeti joba bar. Byltyrdan beri un men bidaidy eksporttap jatyrmyz. Bizdiń unymyz álemdegi eń úzdikterdiń qatarynda», - deidi E.Sultanov.
SQO ákimi Qazaqstandaǵy investorlar jumysynyń tiimdi sharttary jáne biznes damýynyń artyqshylyqtary týraly aqparat berdi.
Liaochen qalasynyń ókili Chen Ping oblys basshylyǵyna qonaqjailylyq úshin alǵys bildirip, Shandýn provintsiiasy jaily sóz qozǵady.
«Provintsiiamyzda 8 aýdan, úsh ekonomikalyq aimaq jáne 6 mln halyq bar. Ónerkásipte tústi metaldy – mysty óńdeimiz. Sondai-aq, himiialyq qaita óńdeý jáne jer ielenýmen ainalysamyz.
«Týrizm – bolashaǵynan zor úmit kútetin baǵytymyz. Al aýyl sharýashylyǵynda ósimdik ósirý qolǵa alynǵan. Jyl saiyn 5 mln tonna bidai jinaimyz», - deidi Chen Ping.
Qytai soltústik qazaqstandyqtarmen aýyl sharýashylyǵy salasynda yntymaqtastyq ornatýdy josparlap otyr.
«Sizde AÓK jaqsy damyǵan. Osy salada jumys istegimiz keledi. Sondyqtan, logistikalyq ortalyq qurýdy josparlap otyrmyz. Jobamyzdy iske asyramyz dep oilaimyn. Aldymen, investitsiia quiamyz. Biraq, bolashaqta birlesken kásiporyndar ashý nietimiz bar», - dep túiindedi qytailyq basshy.
Oblys ákimi Erik Sultanov kezdesýdi qorytyndylap, investorlarǵa qolǵa alynǵan jobalardy júzege asyrý úshin jan-jaqty qoldaý kórsetemiz dep ýáde berdi.
