8 mamyr kúni jolǵa shyqqan Serik Zeineluly bul alys sapar barysyn aýzyna bir túiir de nan salmai, tek sý iship qana júrip ótýdi maqsat etken. Aita keterligi, marafonshynyń tamaq ishpegenin dáleldeý úshin boiyna arnaiy apparat taǵylyp, kamera ornatylǵan. Densaýlyǵyn qadaǵalap otyrý úshin inisi arnaiy komanda jasaqtaǵan.
Ol alǵashqy 29 kúnde 1019 kilometr jol basyp, Álemdik rekord sertifikat agenttiginiń (World Record Certification Agency) «tamaq ishpei eń uzaq jaiaý júrgen sportshy» degen sertifikatyn enshiledi (Farthest distance walked while fasting). Munymen toqtamaǵan Serik Zeineluly tamaq ishpesten taǵy 4 myńǵa jýyq shaqyrymdy artqa tastap, búgin Shanhai qalasyna at basyn tiredi.
3 aidan astam asqazanyna dám salmaǵan qandasymyz búginnen bastap tamaqtanýdy bastaidy dep otyr. Bul týraly ol «Tik-Tok» áleýmettik jelisinde tikelei efirde málim etti.
«Meni qoldap qýattaǵan barlyqtaryńyzǵa kóp rahmet! Qazir meniń densaýlyǵym erekshe jaqsy. «Bataly qul arymas, batasyz qul jarymas» deidi. Men attanǵannan beri áleýmettik jelilerde qanshama ata-apalarymyz, tipti kishkentai balalar tileýimdi tilep, batasyn berip jatty. Alǵash saparǵa attanarda jergilikti memlekettik organdarǵa josparymyzdy aittyq. Alaida olar tamaq ishpei bulai uzaq júrý adam ómirine erekshe qaýipti ekenin aityp, bizdi qoldamaǵan edi. Áitse de, biz óz komandamyzdy jasaqtap, jolǵa attanyp kettik. Basty maqsatym - adam balasynyń erekshe múmkindigin dáleldeý, qatań talap qoiyp, ózin jeńe bilgen adamnyń almaityn biigi joq ekenin búkil álemge pash etý», - deidi sportshy.
Serik Zeineluly 1- 980 jylǵy Shyńjańnyń Ile-Qazaq avtonomiialy oblysynyń týmasy. Jas kezinde sportpen ainalysqan. Qazir - jeke kásipker.
