20-26 mamyr aralyǵynda Qytaidyń mádeniet pen týrizm aptalyǵy ótedi. Oǵan osy eldiń ártisteri, qolónershileri, ýshý sheberleri men saýdagerleri keledi, dep habarlaidy Sputnik Qazaqstan tilshisi.
Aptalyqqa Qytaidyń iskerlik toptary da keledi. Olar Qazaqstanda joǵary dárejeli týristik aimaqtardy qurýǵa qatysty óz usynystaryn jasaidy. Al "Astana Arbat" aimaǵynda qytailyq batbyraýyqtar shoýy men jármeńke uiymdastyrylady. Ol jerde jibek, shái, zergerlik buiymdar, kiim-keshek jáne taǵy basqa zattar satylady.
Qytaidyń mádeniet jáne týrizm ministrliginiń Nur-Sultandaǵy ókildiliginiń basshysy Van Shýlinniń aitýynsha, qazir qytailyqtar arasynda kiizden jasalǵan buiymdarǵa suranys artyp keledi. Osyǵan bailanysty bul eldiń kásipkerleri saýda bailanystaryn ornatýǵa múddeli.
"Sońǵy kezderi qytailyq kásipkerler men týristerge Qazaqstanda kiizden jasalǵan taýarlar qatty unap júr. Sebebi osy jerdiń sheberleri bárin óz qolymen jasaidy. Aptalyq aiasynda saýda kompaniialary da keledi. Olar kiizben jumys jasaityn sheberlermen jaqyn tanysýdy kózdeidi. Árine, saýda-sattyqpen ainalysatyn kompaniialar aldymen jergilikti naryqty zertteidi. Odan keiin qolóner sheberlerimen bailanys jasaidy", - deidi Shýlin.
Al "Kazakh Tourism" ulttyq kompaniiasy basqarma tóraǵasynyń orynbasary Timýr Dúisenǵalievtiń sózine qaraǵanda, Eýropanyń týristeri barǵan jerdiń tabiǵaty men salt-dástúrin zerttep, jańa emotsiialardy izdese, qytailyq týrister zattardy satyp alýdy jaqsy kóredi.
"Búginde Qazaqstan arqyly ushatyn qytailyq týrister úshin 72 saǵattyq vizasyz rejim bar. Biz osy múmkindikti barynsha paidalanýymyz qajet. Máselen, qytailyqtar tanymal brendterdi izdeidi. Sol úshin Dýbai, Parij ben Milanda aialdaidy. Ondai brendter bizde de satylady. Mine, kiizge de qyzyǵýshylyq oiandy. Demek, qazaqstandyq shokolad, bal men koniaktan basqa da dúnieler bar", - dep atap kórsetti Dúisenǵaliev.
Nur-Sultanda ótetin Qytaidyń mádeniet pen týrizm aptalyǵy aiasynda 72 saǵattyq vizasyz rejimmen bir top qytailyq týrist keledi.
