Qytaidyń ońtústigindegi Gýandýn provintsiiasyndaǵy Shenchjen qalasy milliarderler sany boiynsha Niý-Iorkti basyp ozdy. Bul týraly Hurun Report zertteý institýtynyń álemdegi eń bai milliarderler reitingin jariialaǵan baiandamasynda aitylǵan, dep habarlaidy QazAqparat.
Habarlamaǵa sáikes, bir jylda Shenchjendegi eń bai adamdar tizimine segiz milliarder qosylyp, Qytai megapolisindegi olardyń sany 113-ke jetip, Niý-Iorkti basyp ozdy.
Milliarder turǵyndarynyń sany boiynsha qalalar tizimin Qytaidyń megapolisteri bastap tur. Sońǵy málimetter boiynsha, 144 milliarder Beijińde, Shanhaida (121), Shenchjende (113) jáne Niý-Iorkte (110), Londonda (101) turady.
Hurun Report Shenchjendegi milliarderlerdiń kóbeiýi aldaǵy jyldarda megapoliske odan da kóp jas kásipkerlerdi tartatyn úrdisti kórsetetinin atap ótedi. Shenchjenniń órleýi 1980 jyly «reformalar men ashyqtyq» saiasatynyń bir bóligi retinde Qytai materigindegi alǵashqy arnaiy ekonomikalyq aimaq atalýynan bastaldy.
1979 jyldan 2021 jylǵa deiin Shenchjenniń jalpy ishki ónimi 475 milliard dollarǵa deiin ósti. Qalada Qytaidyń eń iri tehnologiialyq kompaniialary, sonyń ishinde telekommýnikatsiialyq alpaýyt Huawei jáne internet-konglomerat Tencent ornalasqan.
Jergilikti biliktiń málimetinshe, ótken jyly Shenchjen qalasynda 2500 jańa joǵary tehnologiialyq kompaniia qurylyp, olardyń jalpy sany 17 myńǵa jetken.
