Qytaidaǵy qaýipti jańa koronavirýs investorlarǵa da áserin tigizdi, dúisenbi kúni Qytai kompaniialarynyń aktsiialary quldyrap ketti, dep habarlaidy QazAqparat CNN-ge silteme jasap.
Shanghai Composite 9%-ǵa tómendedi. Shenchjendegi komponentter indeksi de birden 9%-ǵa qulady. Kórsetkishter, kem degende, 7%-ǵa tómendedi.
Shanhai men Shenchjendegi qor birjalary 24 qańtardan bastap qytaidyń Jańa jylyn toilaý kezinde jabylǵan bolatyn. Osy kezde jariia etilgen málimetke sáikes 14 300 adam infektsiia aýrý juqtyrdy, olardyń kópshiligi Qytaida turady.
Birja ashylar kezde Qytai turaqtylyqty saqtap qalý úshin naryǵyna milliardtaǵan aqsha quiatynyn jetkizdi. Jeksenbi kúni Qytai Ulttyq banki bankterdiń nesie berýge qabilettiligin nyǵaitý úshin qysqamerzimdi obligatsiiany satyp alý qaǵidatyn paidalanyp, qytai naryǵyna 1,2 trillion iýan (173 milliard dollar) baǵyttaityn jetkizdi. Bul shara bank júiesindegi «joǵary ótimdilikti» jáne valiýta naryǵynyń turaqtylyǵyn baqylaýǵa kómektesedi.
Naryqqa baǵyttalǵan ótimdiliktiń naqty mólsheri odan tómenirek bolady. Reuters dúisenbi kúni Ortalyq bank málimetterin negizge alyp, basqa qysqamerzimdi obligatsiialyq kelisimderdi óteý merzimi 1 trillion iýannan asatynyn aitty. Bul aqsha ainalymynyń taza somasy 150 mlrd iýanǵa (22 mlrd dollar) tómendegenin kórsetedi.
Ortalyq bank basshysynyń orynbasary Pan Gýnshen, jaǵdaidy turaqty ustap turýǵa qandai sharalar qajet ekendigin anyqtaý úshin Ortalyq bank qarjy mekemeleri jáne naryqtarmen bailanysta bolatynyn jetkizdi.
Qytaidyń qarjy retteýshisi qarjylyq turaqtylyqty saqtap qalý men ekonomikaǵa kómek kórsetý úshin basqa da on shaqty sharany atap ótti. Retteýshi qarjylyq qyzmetterdi jeke tulǵalar men kompaniialarǵa kóbirek usynatynyn málimdedi.
Aziianyń basqa elderindegi birjalar dúisenbi kúni baǵa quldyraýymen ashyldy. Japoniialyq Nikkei 225 (N225) 1,5%-ǵa qulady. Aita keterligi, elde koronavirýs juqtyrǵan 20 adam tirkelgen.
Ońtústikkoreialyq Kospi 1,6%-ǵa tómendedi. Bul elde jańa koronavirýs juqtyrǵandar sany 15-ke jetti.
