Qytai Halyq Respýblikasynyń kedendik statistikasymen aradaǵy alshaqtyq qysqardy. Bul týraly Májilistiń jalpy otyrysynda QR Úkimetiniń 2020 jylǵy respýblikalyq biýdjettiń atqarylýy týraly esebin talqylaý kezinde QR Qarjy ministri Erulan Jamaýbaev málim etti, dep habarlaidy "Ult aqparat".
«Jii kóterilip júrgen máseleniń biri – ol Qytai Halyq Respýblikasynyń kedendik statistikasymen aradaǵy alshaqtyqqa qatysty. Álemdik tájiribede syrtqy saýda statistikasyndaǵy osyndai alshaqtyqtar kóptegen elderge tán. Mysaly, 2019 jyly Qytai Halyq Respýblikasy men Amerika Qurama Shtattary arasyndaǵy syrtqy saýda derekteriniń sáikessizdigi 50 mlrd dollardan astam bolsa, Germaniiamen - 45 mlrd dollardy qurady. Barlyq Eýraziialyq ekonomikalyq odaq elderinde de Qytai Halyq Respýblikasymen osyndai problemalar bar», - dedi Jamaýbaev.
Osy oraida Qazaqstan men QHR arasyndaǵy kórsetkishterge túsinik berdi.
«Bizdiń jaǵdaiǵa kelsek, statistikadaǵy alshaqtyqtyń aitarlyqtai bóligi Qytai tarapynyń bizdiń elimiz arqyly taýarlar tranzitiniń edáýir bóligin ózderinde Qazaqstanǵa eksport retinde esepke alýymen bailanysty. Sonymen qatar, Qytaidan shyǵatyn taýarlar baǵasy kótermelenip kórsetiledi, al bizge kelgende kásipkerler kerisinshe tómendetýdi kózdeidi. Degenmen qabyldanǵan sharalar úsh jyldyń ishinde alshaqtyq mólsherin 60 paiyzdan 45 paiyzǵa deiin qysqartýǵa múmkindik berdi. Osy baǵyttaǵy jumys jalǵasýda», - dedi ministr.
