Densaýlyq saqtaý ministrliginiń Taýarlar men kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary, Qazaqstannyń bas sanitarlyq dárigeri Jandarbek Bekshin Qytaidan taǵy 363 otandasymyzdyń qaitýǵa niet bildirip otyrǵanyn jetkizdi, dep habarlaidy QazAqparat.
«Álemde koronavirýs boiynsha epidemiologiialyq jaǵdaidyń nasharlaýyna bailanysty, birinshiden, Memleket basshysynyń tapsyrmasy boiynsha Úkimet basshysynyń orynbasary Berdibek Saparbaevtyń tóraǵalymen koronavirýstyq infektsiianyń paida bolýy men taralýyna jol bermeý úshin is-sharalardy úilestirý jónindegi komissiia quryldy. Onyń quramyna barlyq múddeli memlekettik organdardyń, oblystar men Nur-Sultan, Almaty, Shymkent qalalarynyń ákimdikteri kiredi. Ekinshiden, QR aýmaǵynda koronavirýstyq infektsiianyń taralýyna jol bermeý boiynsha is-sharalar jospary iske asyrylýda», - dedi Jandarbek Bekshin OKQ-da ótken baspasóz máslihatynda.
Sonymen qatar, QHR arqyly ótetin barlyq pýnktte sanitariialyq-epidemiologiialyq baqylaý kúsheitilgen. Teplovizorlar ornatylyp, baqylaý monitoringi júrgizilýde.
«Meditsinalyq uiymdardyń daiyndyǵy qamtamasyz etildi. 10200 tósek, onyń ishinde 4400 qosymsha tósek oryndar daiyndalyp, maskalardyń, meditsinalyq buiymdardyń baǵasy, olardyń qorlary baqylaýǵa alyndy. Qorǵas saýda ortalyǵynyń jumysy toqtatyldy. 6 aqpanda Ýhan qalasynan sanaviatsiiamen 83 qazaqstandyq, sondai-aq Qyrǵyzstannyń 18 azamaty, Belarýs Respýblikasynyń 5, Armeniianyń 1 azamaty evakýtsiiadan ótti. Olar keiin arnaiy meditsinalyq mekemege karantinge jatqyzyldy», - dedi ol.
Jandarbek Bekshinniń sózine sensek, Qazaqstanda koronavirýsty jedel diagnostikalaýǵa múmkindik beretin diagnostikalyq júie ázirlengen.
«Budan basqa RF-men QHR-dan diagnostikalyq testter alyndy. Osylaisha koronavirýstyń infektsiiaǵa kúdikti barlyq patsient, sondai-aq Ýhan qalasynan arnaiy bortpen kelgen adamdarǵa zerthanalyq diagnostika júrgizildi. Barlyǵy 313 adam tekserildi. Nátijesinde koronavirýs tabylǵan joq. RF men ÓR Densaýlyq saqtaý ministrlikterimen birlesip, Ýhan qalasynan evakýtsiialanǵan azamattarymyzdyń densaýlyǵyna monitoring júrgizilýde», - dedi ol.
Onyń aitýynsha, Túmen oblysynda úsh qazaqstandyq, Tashkentte bes adam jatyr. Barlyq qazaqstandyqtyń jaǵdaiy qanaǵattanarlyq.
«Sonymen qatar, Beijiń qalasynan Qazaqstan azamattaryn shyǵarý máselesi qarastyrylýda. Búgingi tańda 363 adam qaityp kelýge niet bildirip otyr. Búgin tańǵy saǵat 05.00-de Nur-Sultan qalasyna Qytaidan Qazaqstannyń 217 azamaty bar reis keldi. Olardyń bári de úsh kúndei meditsinalyq jáne zerthanalyq tekserý úshin statsionarǵa jetkizildi», - dedi ol.
Eske sala ketsek, Qytai astanasy Beijińnen búgin Qazaqstannyń 217 azamaty evakýatsiialanǵan bolatyn.
Sondai-aq, qazirgi ýaqytta Qazaqstanda koronavirýstyq infektsiianyń taralýyna jol bermeý boiynsha barlyq qajetti sharalar qabyldanyp jatyr. QR Premer-Ministri Asqar Mamin búgingi Úkimet otyrysynda osylai dei kele Qazaqstanda koronavirýsqa shaldyqqandardyń joqtyǵyn málim etken bolatyn.
