Qytaidan Qazaqstanǵa sálemdemeler jetkizý ýaqyty eki esege qysqarady, - dep habarlaidy kaz.tengrinews.kz "Qazposhta" AQ baspasóz qyzmetine silteme jasap. Tiisti shartqa Ulttyq poshta operatory delegatsiiasynyń Qytaiǵa sapary barysynda "Qazposhta" AQ jáne China Post Group ókilderi búgin qol qoidy.
"Elektrondyq kommertsiia naryǵynyń álemdegi jyl saiynǵy ósý qarqyny 30 paiyzdan astam jáne negizgi ósý draiverleriniń biri qytai internet-alańdary. QR kiris poshtasynyń jalpy kólemindegi qytai sálemdemeleriniń úlesi 60 paiyzdan artyq jáne jyldan-jylǵa artyp keledi. Eger 2014 jyly ol 2,5 million danaǵa jetken bolsa, al 2015 jyly 3,6 million danaǵa deiin ósti, bul kórsetkish ótken jyly 4 mln. danany qurady. Biz 2017 jyldyń birinshi toqsanyndaǵy poshta kóleminiń 2016 jylǵy 1 toqsanmen salystyrǵanda 2 ese óskendigin baqyladyq (0,8 million danadan 1,6 millionǵa)", - dep atap ótti Qazposhta basshysy Saken Sarsenov.
"Sálemdemelerdi jetkizý merzimi turǵysynda da damýǵa niettimiz jáne aldaǵy kúnderi servis sapasyn arttyrý úshin qytai tarapyna da merzimdi eki ese qysqartýǵa usynys jasadyq jáne QHR-da qabyldanǵan sátinen bastap, QR-da berilgen sátke deiin shamamen 18 kún bolmaq", - dedi ol.
Sondai-aq qytailyq tarapqa treking servisin jaqsartý jáne eki el poshtasynyń arasynda 100 paiyz AT-integratsiia júrgizý, EDI oqiǵalary elektrondyq derekterin jóneltýshi men alýshynyń mekenjai derekterimen almasýdy jolǵa qoiý usynyldy.
Aita keteiik, Qazposhta CPEL (China Post Express Logistic) ókilderimen birigip, Qytaidan keletin shaǵyn jóneltimder úshin EPAKET jańa ekspress-ónimin jasap shyǵardy, ol DHL, Fedex siiaqty alpaýyttarmen jáne basqa da kýrerlik kompaniialarmen básekelese alady. Bul, álbette, qazirgi ýaqytta jóneltimderdiń jalpy kóleminiń 1%-na da jetpeitin ekspress-jóneltimderiniń (EMS) úlesinde oń kórinis beredi.
Sonymen qatar, Qazposhta basshysy Saken Sarsenov Alibaba, Jumore, E2B (Enterprise to Business) kompaniialar toby basshylarymen, sondai-aq logistika salasyndaǵy SF Express - QHR-daǵy eń iri logistikalyq kompaniianyń basshysymen ekijaqty kezdesýler ótkizdi. Kezdesýler aiasynda aldaǵy ekijaqty yntymaqtastyq jónindegi naqty jobalar belgilendi.
Eske sala keteiik, ótken jyly Qazaqstan Respýblikasynyń Prezidenti N.Nazarbaev "Úlken jiyrmalyq" elderi sammitinde QHR basshysymen eki el yntymaqtastyǵyn tereńdetý jóninde, atap aitqanda, Jibek joly ekonomikalyq beldeýin qurý týraly ideiasyn aita otyryp, elderdiń tranzittik-logistikalyq áleýetin damytý týraly ekijaqty kezdesýler ótkizgen bolatyn. Osy oraida aityp ótken jón, Jibek joly beldeýin jańǵyrtý jónindegi osy bastama elimizdiń tranzittik áleýetin tolyqtai ashýǵa baǵyttalǵan Qazaqstannyń "Nurly jol" jańa ekonomikalyq saiasatyna ulasady.
