QR Densaýlyq saqtaý ministrliginiń resmi ókili Dias Ahmetshárip 6 qańtardan keiin Qytaidan oralǵan turǵyndardyń densaýlyǵy týraly aitty, dep habarlaidy QazAqparat.
«6 qańtardan bastap, búginge deiin Qazaqstanǵa Qytai memlekettik shekara pýnktteri arqyly 30 394 adam keldi. 6 qańtardan 4 aqpanǵa deiin Densaýlyq saqtaý ministrligi mamandary Qytaimen memlekettik shekara arqyly ótetin áýejailar men temirjol beketterinde 21 838 adamdy, onyń ishinde 20 084 jolaýshy men 1 814 ekipaj múshelerin tekserdi. 29 jolaýshydan dene qyzýy men JRVI belgileri anyqtaldy. Olardyń 28-i aýrýhanaǵa jatqyzyldy», - dedi Dias Ahmetshárip Qazmedia ortalyǵynda ótken brifingte.
Qazirgi ýaqytta poiyzdardyń qozǵalysy, áýe qatynasy jáne Qytaimen jeńil avtokólik tasymaly toqtatyldy. Meditsinalyq uiymdar turǵylyqty jeri boiynsha Qytaidan kelgen azamattardyń densaýlyǵyn baqylaýdy jalǵastyryp otyr.
«5 aqpanǵa deiin JRVI belgileri bar 104 adam aýrýhanaǵa jatqyzyldy, 71 adam aýrýhanadan shyǵaryldy. 33 patsient statsionarda qaldy. Naýqastardyń jaǵdaiy jaqsy. Koronavirýs anyqtalǵan joq. Barlyq aýrýhanadan alynǵan synamalar qosymsha baqylaý úshin Almatydaǵy Ulttyq ǵylymi erekshe juqpaly aýrýlar ortalyǵyna jiberiledi. Bul ortalyq jańa koronavirýsty Polimerazdy tizbekti reaktsiia ádistemesin meńgergen», - dedi D. Ahmetshárip.
Álem boiynsha, jańa koronavirýs saldarynan qaza tapqandar sany búgin 490-ǵa jetti.
