QR SIM resmi ókili Aibek Smadiiarov Qytaidaǵy etnikalyq qazaqtardyń jaiy týraly suraqqa jaýap berdi, dep habarlaidy QazAqparat tilshisi.
«Qazaqstan qoǵamy men memleket, ásirese Syrtqy ister ministrligi shetelde turatyn qazaqtardyń jaǵdaiyn muqiiat baqylap otyrady. Qazirgi tańda Qytaidaǵy etnikalyq qazaqtyń sany 1,5 millionnan asady. Olar Qytaidyń tolyqqandy azamaty bolyp sanalady jáne sol elde quqyq qorǵaý, biznes, ǵylym jáne áleýmettik salalarda jumys atqaryp keledi. Árbir jaǵdaida biz Qytai tarapyn zańǵa sáikes, obektivti jáne ádil áreket etýge shaqyramyz», - dedi Aibek Smadiiarov QR SIM-de ótken baspasóz máslihatynda tilshilerdiń suraǵyna jaýap bere otyryp.
QR SIM resmi ókili ótken jyldyń sońynda Qytai tarapymen tabysty kelissózderdiń nátijesinde 2,5 myńnan astam etnikalyq qazaqqa Qytaidyń azamattyǵynan shyǵýǵa múmkindik berilgenin eske saldy.
«Biraq, shetelde qazaq diasporasyn qoldai otyryp, biz shet memleketterdiń ishki isterine aralasýǵa jol bermeitin halyqaralyq zańǵa súienýimiz qajet», - dedi ol.
Eske sala ketsek, ótken aida Aibek Smadiiarov Qytaida turatyn 2 myń etnikalyq qazaq atalmysh elden shyǵýǵa ruqsat alǵanyn habarlaǵan bolatyn.
«Diplomatiialyq arnalar arqyly Qytai tarapymen jumys júrip jatyr. Qytai tarapy izgi ishara retinde Qytai aýmaǵynan 2 myńnan astam qazaqtyń shyǵýyna ruqsat berdi», - degen edi Aibek Smadiiarov.
