COVID-19 aýrýyna shaldyqqandar sanynyń artýyna bailanysty Qytaidyń Harbin qalasyna kirýge tyiym salyndy. Bul aqparatty Reuters agenttigi habarlady.
Qaladan shyqqysy kelgen turǵyndar saqshylarǵa koronavirýs juqpaǵany týraly QR-kodty kórsetýi qajet. Turǵyndar qala ishinde meditsinalyq maska taǵýǵa mindettelgen.
Agenttiktiń jazýynsha, 10 mln turǵyny bar Harbin qalasy - Qytaidaǵy koronavirýstyń ekinshi tolqyny oshaǵyna ainalǵan. Sońǵy on kúnde qalada 57 adamnan koronavirýs tabylǵan.
Koronavirýs infektsiiasy byltyr jeltoqsan aiynda Qytaidyń Ýhan qalasynan tarai bastaǵan. Sáýir aiynyń basynda Qytai biligi turǵyndarǵa qaladan shyǵýǵa ruqsat berdi.
Biliktiń dereginshe, Qytaida jalpy 83 myńnan astam adamnan koronavirýs tabylǵan, 4,6 myń adam qaitys bolǵan.
Dúniejúzilik densaýlyq saqtaý (DDSU) uiymy koronavirýs indetiniń qashan toqtaitynyn aitý ázirge erte dep sanaidy. Uiym jetekshisi Tedros Gebreisýstiń aitýynsha, Batys Eýropada jaǵdai turaqtalǵanmen Afrika, Ońtústik jáne Ortalyq Amerika, Shyǵys Eýropada virýs juqtyrǵandar kóbeiip barady.
23 sáýir kúngi málimet boiynsha, álemde 2,6 mln adamǵa virýs juqqan, 183 myńnan astam adam qaitys bolǵan.
