Qytai shyǵysyndaǵy Chjetszian, Shandýn jáne Anhoi provintsiialaryna tóngen «Lekima» taifýny 49 adamnyń ómirin qidy. Taǵy 21 adam habar-osharsyz ketken, dep habarlaidy «Sinhýa» agenttigi.
«Lekima» taifýny qurlyqqa alapat daýyl men nóser ala kelgen.
Dúisenbi tańyndaǵy málimet boiynsha qaza tapqandar sany 39-ǵa jetip, 9 adam habar-osharsyz ketken.
Biyl Qytaiǵa kelgen toǵyzynshy taifýnnan Chjetszian provintsiiasynyń 6,68 mln turǵyny zardap shekti. Sonyń 1,26 milliony evakýatsiialanǵan. 234 myń gektar eginge zaqym keldi. Keltirilgen zalal kólemi 24,22 mlrd iýannyń (shamamen 3,4 mlrd dollar) ainalasynda.
«Lekima» Qytaidyń shyǵys jaǵalaýyna senbi kúni tańǵy 1:45-te jetken. Shandýn provintsiiasynyń Tsindao jaǵalaýyna jeksenbi kúni 8:50-de jetti. Munda apat saldarynan 5 adam qaza taýyp, 7 adam habar-osharsyz ketken, 1,66 mln adam zardap shekti, provintsiianyń 183,8 myń turǵyny qaýipsiz jerge kóshirilgen.
Shandýnda tolassyz jaýǵan nóser men daýyl saldarynan 175,4 myń gektar egistik alqabyna zaqym kelip, 609 úi qiraǵan. Bilik 1,48 mlrd iýan ekonomikalyq zalal keldi dep eseptep otyr. Provintsiianyń Veifan qalasynda ortasha jaýyn-shashyn mólsheri 217,5 mm-ge jetken.
Anhoida 4 adam qaza tapty. 130 myńnan astam zardap shegip, 20 myńy evakýatsiialanǵan.
Munda dúisenbidegi málimet boiynsha, 364 úi tolyqtai qirap, taǵy 439-yna aitarlyqtai zaqym kelgen. 6 myń gektar egistik alqaby typ-tipyl boldy.
