قىتاي شىعىسىنداعى چجەتسزيان, شاندۋن جەنە انحوي پروۆينتسييالارىنا تٶنگەن «لەكيما» تايفۋنى 49 ادامنىڭ ٶمٸرٸن قيدى. تاعى 21 ادام حابار-وشارسىز كەتكەن, دەپ حابارلايدى «سينحۋا» اگەنتتٸگٸ.
«لەكيما» تايفۋنى قۇرلىققا الاپات داۋىل مەن نٶسەر الا كەلگەن.
دٷيسەنبٸ تاڭىنداعى مەلٸمەت بويىنشا قازا تاپقاندار سانى 39-عا جەتٸپ, 9 ادام حابار-وشارسىز كەتكەن.
بيىل قىتايعا كەلگەن توعىزىنشى تايفۋننان چجەتسزيان پروۆينتسيياسىنىڭ 6,68 ملن تۇرعىنى زارداپ شەكتٸ. سونىڭ 1,26 ميلليونى ەۆاكۋاتسييالانعان. 234 مىڭ گەكتار ەگٸنگە زاقىم كەلدٸ. كەلتٸرٸلگەن زالال كٶلەمٸ 24,22 ملرد يۋاننىڭ (شامامەن 3,4 ملرد دوللار) اينالاسىندا.
«لەكيما» قىتايدىڭ شىعىس جاعالاۋىنا سەنبٸ كٷنٸ تاڭعى 1:45-تە جەتكەن. شاندۋن پروۆينتسيياسىنىڭ تسينداو جاعالاۋىنا جەكسەنبٸ كٷنٸ 8:50-دە جەتتٸ. مۇندا اپات سالدارىنان 5 ادام قازا تاۋىپ, 7 ادام حابار-وشارسىز كەتكەن, 1,66 ملن ادام زارداپ شەكتٸ, پروۆينتسييانىڭ 183,8 مىڭ تۇرعىنى قاۋٸپسٸز جەرگە كٶشٸرٸلگەن.
شاندۋندا تولاسسىز جاۋعان نٶسەر مەن داۋىل سالدارىنان 175,4 مىڭ گەكتار ەگٸستٸك القابىنا زاقىم كەلٸپ, 609 ٷي قيراعان. بيلٸك 1,48 ملرد يۋان ەكونوميكالىق زالال كەلدٸ دەپ ەسەپتەپ وتىر. پروۆينتسييانىڭ ۆەيفان قالاسىندا ورتاشا جاۋىن-شاشىن مٶلشەرٸ 217,5 مم-گە جەتكەن.
انحويدا 4 ادام قازا تاپتى. 130 مىڭنان استام زارداپ شەگٸپ, 20 مىڭى ەۆاكۋاتسييالانعان.
مۇندا دٷيسەنبٸدەگٸ مەلٸمەت بويىنشا, 364 ٷي تولىقتاي قيراپ, تاعى 439-ىنا ايتارلىقتاي زاقىم كەلگەن. 6 مىڭ گەكتار ەگٸستٸك القابى تىپ-تيپىل بولدى.
