Qytaidyń Shenchjen qalalyq soty embrionǵa gendik modifikatsiia jasaǵan qytailyq úsh ǵalymǵa qatysty alǵashqy sot otyrysynyń ashyq úkimin jariialady, dep habarlaidy Sinhýa agenttigi.
Tergeý anyqtaǵandai, qytaidyń Ońtústik ǵylym jáne tehnika ýniversiteti (Southern University of Science and Technology) dotsenti He Djiankýi 2016 jyldan beri Djan Renli jáne Djin Joý atty meditsinalyq uiymnyń qyzmetkerlerimen birlesip, adam embrionyna zańsyz gendik modifikatsiia jasaý tájiribesin jasaǵan. Sondai-aq, olar memlekettiń tekserisinen jaltara otyryp bul tehnikany reprodýktivti meditsinaǵa qoldanǵan. Qortyndysynda olar jasyryn túrde CCR5 geni joq 3 sábidi dúniege ákelgen.
Qasaqana eldiń ǵylymi zertteý jáne densaýlyq saqtaýdy basqarý zańyna qaishylyq jasaǵany, sol arqyly meditsinalyq tártipti buzyp, qoǵamǵa aýyr zalal keltirgeni úshin, sot He Djiankýidi 3 jylǵa bas bostandyǵynan aiyryp, 3 mln iýan (430 myń dollar) kóleminde aiyppul tóleýge mindettedi. Sondai-aq, kómekshileri Djan Renli 2 jylǵa, Djin Joý 1 jyl 6 aiǵa bas bostandyǵynan aiyrylyp, 1 mln iýan (143 myń dollar) jáne 500 myń iýan(71,6 myń dollar) aiyppul salyndy.
Aita keteiik, He Djiankýi 2018 jyly qarasha aiynda gendik modifikatsiia jasalǵan embrionnan egiz balalardyń dúniege kelgenin jariialaǵan bolatyn. Onyń aitýynsha, olardyń geni VICh infektsiiasyna qarsy tura alatyndai etip ózgertilgen. Qytailyq ǵalymnyń gendi ózgertý úshin belgili bir gendi alyp tastaýǵa nemese qosýǵa múmkindik beretin CRISPR-cas9 qurylǵysyn paidalanǵanyn aitqan.
