- Jaqynda Shynjań uiǵyr telearnasynyń «Shyryn tús» baǵdarlamasynyń taqyrybyna arqaý bolǵan qandasymyz Zaira Aseiinǵazyqyzynyń izgi isteri Qytai halqyn tebirentip, áleýmettik jelilerde qyzý talqylanyp jatyr, dep habarlaidy Ult.kz tilshisi QazAqparat agenttigine silteme jasap.
Baǵdarlamada belgili bolǵandai, Zaira Aseiinǵazyqyzy ata-anasynan aiyrylǵan jarymjan balalarǵa arnaiy ortalyq ashqan eken. Ol osy kúni atalǵan ortalyqta ár ult ókilderinen 62 múgedek ári jetim balalardy óz qamqorlyǵyna alyp, oqytyp, túrli qajettilikterine kómektesýde. Zaira bul isin óziniń basynan ótken taǵdyrymen bailanystyrady.
«Meniń ózim 4 jasymda jetim qaldym. Er jetýime, ómirimdegi qiyn kezeńderdi eńserýge kóptegen meiirban adamdar kómek berdi. Kishkene kezimde turmysymyz óte tómen boldy. Sonda, keiin er jetkende, ózim sekildi jetim balalarǵa járdem qylsam, mańdaiynan syipasam dep armandaitynmyn. Mektep bitirgennen keiin joǵary oqý ornyna túsýge qarajatym bolmady. Sosyn zaýytqa turyp, aýyr jumystar isteýge májbúr boldym», - dep áńgimeleidi Zaira Aseiinǵazyqyzy. Osylaisha erte jastan eńbekke aralasqan ol kóptegen qiynshylyqtardy bastan keshkenin aitady.
Syrqattanyp tósek tartyp qalǵan kezderi, tipti, 40 kúndei tek qurǵaq nan jep, qainaǵan sýmen ózek jalǵaǵan kezder bolypty. Áitse de, taǵdyrdyń aýyr synaǵyn eńserýge meiirban jandardyń kómegi kóp septigin tigizgen.
«Aýrýym asqynǵan kezde jeke emhanasy bar bir dáriger kisiniń arqasynda tegin emdelip, jazyldym. Bul maǵan jiger berdi. Aqsham joq bolsa da, ómirde jaqsy adamdar bar ekenine kózim jetti. Keiin kóshede nan surap, qaiyr tilep júrgen bir ájeni kórip, áńgimege tarttym. Ol kisiniń balalary ómirden erte ozypty. Men ájege kómektesip, oǵan bala boldym. Osylaisha ómirden ózime kóptegen analar, ákeler taptym. Ózim kórgen qiyndyqtardy búgingi jetimder kórmese eken dedim. Sol úshin ata-anasynan aiyrylǵan múgedek balalardy jinap, baýyryma bastym. Olardyń ónerin ushtaýǵa, ómirden óz úlesterin alýǵa barynsha jigerlendirip kelemin. Búginde 8 ult ókilinen 62 balam bar. Olardyń biriniń ákesi joq, biriniń sheshesi joq, bireýiniń aiaǵy joq, biriniń kózi kórmeidi», - deidi Zaira Aseiinǵazyqyzy.
Onyń aitýynsha, bul álem jaqsy adamdarǵa toly. Ómirde barlyq adam teń. Alaida, solai bola tura, adamdar aqshadan, jaqsy ómirden jalyǵýy múmkin, al izgilik pen mahabbattan, qamqorlyq pen meiirimnen adam balasy esh jalyqpaidy.
«Men bul jetimekterdi izgi-nietti jandardyń kómeginiń arqasynda baǵyp jatyrmyn. Kómek qolyn sozatyndar kóp. Qazir balalarymnyń 20-sy úilendi. Men osy ortada júrip kóptegen áserli, izgi isterge kýá boldym. Birde 23 jastaǵy on eki múshesi saý, oqyǵan qyz kelip, kózi múldem kórmeitin zaǵip jigitpen bas qosty, otaý qurdy. Ainalasyndaǵy biraz jurt oǵan: «Sen oqyǵansyń, bolashaǵyń bar qyzsyń, nege múgedek janǵa óz taǵdyryńdy bailaisyń», dep qarsy boldy. Sonda álgi qyz: «Men bul dúnieden eshteńe istemei ótsem de, osy jigittiń qos janary bolaiyn», - dedi. Mine osydan artyq qandai adamgershilik, qandai izgilik bar», - dep kózine jas alady Zaira Aseiinǵazyqyzy.
Baǵdarlama barysynda, Zaira Aseiinǵazyqyzynyń tárbiesindegi jarymjan qazaq qyzy án saldy jáne qoly joq, qulaǵy estimeitin, sóilei almaityn balanyń aýzymen, aiaǵymen salǵan sýretteri kórsetildi. Sonymen birge baǵdarlamaǵa qonaq retinde shaqyrylǵan kásipkerler qaisar qazaq qyzynyń meiirimdiligine, erligine alǵystaryn bildirip, óz kómekterin jasady.
