Qytaida jumbaq jaǵdaida qaza tapqan stýdent qyzdyń týystary ádilettilikke qol jetkize almai júr.
Olardyń aitýynsha, Sandira Serikhandy bireýler ádeii 17-qabattan qulatyp jibergen kórinedi. Chanchjoýdaǵy eń myqty ýniversitettiń birine grantqa túsken qandasymyzdyń ómiriniń sońǵy sátteri taspaǵa túsip qalypty. Biraq is sýitsid dep jabylyp tyndy, dep habarlady Sputnik KTK arnasy silteme jasap.
Sandira Serikhan Nur-Sultandaǵy eń maqtaýly gimnaziianyń túlegi. Nebári 16 jasynda qytai tilin meńgergen qyz birden grantqa oqýǵa túsken. Alaida, Qytaiǵa arman arqalap ketken qarakózimizdiń elge tabyty keldi. Sondaǵy politsiianyń resmi málimeti boiynsha, sabaǵyn 5-ke oqyp júrgen qyz óz erkimen 17-shi qabattan sekirip ketken.
"Sandira sýitsid jasady degenge senbeimiz. Ol jazǵy demalysqa úige jinalyp jatqan. Sol kúnniń aldynda ǵana videomen sóilestik. Baýyrlaryna satyp alǵan syilyqtaryn kórsetip, anasymen máz-meiram bolǵan. Qyzymyzdy ádeii óltirip otyr", - deidi marqum qyzdyń naǵashy ápkesi Álnur Aǵaeva.
Qyzdyń instagramynan belgili bolǵanyndai, sol kúni Sandirany Baian degen basqa bir stýdent klýbqa baraiyq dep qoimai, aqyry kóndiripti. Onda Madiiar jáne Daniiar degen dostarymen tanystyrǵan. Kesh sońynda Daniiar páterden bir zat alý kerek degen syltaýmen birge barýyn ótinip qoimaǵan eken. Qyz keliskenimen, tabaldyryqtan ári attaǵysy kelmei turǵany podezdegi taspaǵa túsip qalǵan. Videoda jigit qyzdy jetektep kirgizgen deidi Álnur Aǵaeva. Birazdan soń Sandira páterden jylap shyǵady. Ári qaraiǵy jaǵdai taspadan tys jerde jalǵasqan.
Jigittiń aitýynsha, qyzdyń 17-shi qabattan qalai qulap ketkeni esinde joq. Ne úshin jylap júrgenin de túsindirip bere almapty.
"Daniiar Imanqulov degen jigit Shymkentten. Qyz nege jylady degen suraqqa jaýap bere almady. Aitýynsha, ózi de shokta bolǵan", - dep tolyqtyrdy Sandiranyń naǵashy ápkesi.
Bilmeimin dep basyn ala qashqan jigit sol kúii qarasyn batyrypty. Úsheýi de oqý ornyna izdep barǵan qyzdyń ákesimen jolyǵýdan bas tartyp, telefondaryn sóndirip tastaǵan. Týystary zorlyq-zombylyq jasaldy ma dep kúdiktenedi. Odan qaldy, qyzdyń bir aiaq kiimi terezeniń tusynda qalyp qoiǵan. Jaqtaýdan saýsaq izderi tabylmaǵan. Sol sebepti de ony bireýdiń laqtyryp jibergenine senimdi. Biraq muny dáleldeý múmkin bolmai tur. Sebebi, zańy qatal Qytai máiitti 30 kún tekseredi eken. Munshama ýaqyt kúte almaǵan otbasy qyzdyń denesin saraptamasyz elge ákelýge májbúr bolǵan. Al is "sýitsid" dep jabylyp tynǵan. Elimizdiń diplomattary isti qaita qaraýdy surapty. Biraq qorytyndysy ózgermegen.
"Qytai tarapy bul isti qaita qarap shyqty. Onyń nátijesi boiynsha jazataiym oqiǵa bolyp shyqty", - dep túsindirdi syrtqy ister ministrliginiń resmi ókili Aibek Smadiiarov.
Nebári 19 jastaǵy Sandira Serikhan úiiniń úlkeni eken. Otbasynda 4 bala. Kishkentai baýyrlary ápkesi keledi dep kúnde kútip júr.
