Qytaida jańa koronavirýstan qaitys bolǵandar sany 2 myń adamnan asty, dep habarlaidy "Ult aqparat" QHR Gigiena jáne densaýlyq saqtaý máseleleri jónindegi memlekettik komitetke silteme jasap.
Ótken táýlikte (18 aqpan saǵat 24:00-degi jaǵdai boiynsha) qurlyqtyq Qytaida 1749 jańa koronavirýs juqtyrý jaǵdaiy anyqtaldy (Hýbei provintsiiasynda – 1693), 136 adam qaitys boldy. 1824 adam emdelip shyqty (Hýbeide 1266 adam).
Sońǵy derekter boiynsha, QHR-da koronavirýs juqtyrǵandar sany 74185 adamdy qurap otyr, qaitys bolǵandar sany – 2004, emdelip shyqqandar – 14376 adam. Qazirgi ýaqytta naýqastarmen tyǵyz bailanysta bolǵan 135 myń adam meditsinalyq baqylaýǵa alynǵan.
Resmi statistikaǵa sáikes, indettiń oshaǵyna ainalǵan Hýbei provintsiiasynan tys materiktik Qytaida koronavirýs diagnozy qoiylǵan naýqastar sany on besinshi kún qatarynan tómendep keledi.
Gonkongta koronavirýs juqtyrǵan 62 adam tirkeldi, Makaoda (Aomen) – 10, Taivanda – 22.
Sońǵy málimetter boiynsha, Qazaqstanmen shekaralasatyn QHR Shyńjań-Uiǵyr avtonomiialyq ólkesinde (ShUAÓ) koronavirýs juqtyrǵan 76 adam tirkelgen, onyń ishinde Ile-Qazaq avtonomiialyq oblysynda (IQAO) SÝAR - 18, Úrimji qalasynda – 23. Qazirgi ýaqytta Shyńjańda 5 myńnan astam adam meditsinalyq baqylaýda. Meditsinalyq mekemelerden 12 naýqas emdelip shyqty.
