Qytaidyń iri qalalarynda karantinge qarsy jappai narazylyq aktsiialary ótti, - dep habarlaidy Tengrinews.kz tilshisi Daily Mail basylymyna silteme jasap.
Basylym málimetinshe, Qytaidyń iri qalalarynda el biligi SARS-CoV-2 koronavirýsymen kúresýge bailanysty qoiylǵan qatań karantin sharalaryna qarsy jappai narazylyqtar jalǵasty.
Beijińde demonstranttar diplomatiialyq kvartal mańyndaǵy kóshelerge narazylyq belgisi retinde "Si Tszinpin, otstavkaǵa ket, kommýnistik partiia, otstavkaǵa ket" dep urandatyp, "Shyńjańdy ashyńdar, Qytaidy ashyńdar" jáne "biz PTR synaqtaryn tapsyrmaimyz, biz erkindikti qalaimyz" degen jazýdy plakatqa jazyp shyqqan. Politsiia narazylyqqa shyqqandardy ustady, ustalǵandardyń naqty sany belgisiz.
Narazylyq sherýleri Qytaidyń basqa qalalarynda da ótti: Shanhai, Chendý, Chýntsin, Ýhan jáne Nankin. Joǵary oqý oryndarynda da narazylyq kúsheiip jatyr, áleýmettik jelilerde narazylyq aktsiialary beinelengen videolar tolyp ketti.
Qytai biligi koronavirýsqa nóldik tózimdilik dep atalatyn saiasatty ustanyp otyr. Qalalar, búkil aýdandar jabyldy, juqtyrǵandarmen bailanysta bolǵan adamdar májbúrli túrde karantinge alyndy, juqtyrǵandar aýrýhanalarda oqshaýlandy, eldiń shekaralary jabyq.
Narazylyqtar Shyńjań-Uiǵyr avtonomiialyq aýdanyndaǵy Úrimshi qalasyndaǵy turǵyn úidegi órtten keiin bastaldy. 24 qarashada keshki ýaqytta bolǵan órt saldarynan keminde on adam qaza taýyp, taǵy toǵyz adam jaraqat alǵan.
Kýágerlerdiń aitýynsha, adamdar órtten qashyp qutyla almaǵan, óitkeni blokadaǵa bailanysty páterlerdiń esikteri jabylyp, shekteý sharalary qutqarýshylardyń jumysyna kedergi keltirgen. Alaida Qytai biligi bul aqparatty joqqa shyǵarǵan.
