Syrtqy ister ministrligi Qytaida esirtki kontrabandasymen aiyptalǵan Aqjarqyn Turlybaiǵa qatysty qozǵalǵan qylmystyq is boiynsha sot otyrysy ótkenin jariia etti, dep habarlaidy "Ult aqparat".
«Búgin Gýanchjoý sotynda esirtki kontrabandasymen aiyptalǵan Aqjarqyn Turlybaiǵa qatysty qozǵalǵan qylmystyq is boiynsha otyrys ótti. Otyrys barysynda qorǵaýshy tarap usynǵan qylmystyq istiń materialdary qaraldy. Otyrysqa qorǵaýshylar, Qazaqstannyń Qytaidaǵy Elshiliginiń ókilderi, Aqjarqyn Turlybaidyń anasy jáne aýdarmashy qatysty. Kezdesý saǵat 10.00-nan bastap (Gýanchjoý ýaqyty) 2 saǵattan astam ýaqytqa sozyldy», - delingen QR Syrtqy ister ministrliginiń Telegram-daǵy paraqshasynda.
Ministrliktiń habarlaýynsha, Aqjarqyn Turlybaidyń densaýlyǵy jaqsy. Sotta ózin-ózi jaqsy ustap, sot tarapynan qoiylǵan suraqtarǵa óz betinshe qytai tilinde túsinikteme bergen.
«Úkimniń jariialanatyn kúni ashyq», delingen habarlamada.
Sondai-aq, ministrlik biýdjdet esebinen advokat jaldanǵanyn málimdedi.
"Turlybaidyń zańdy quqyqtaryn jáne múddelerin sotta qorǵaý maqsatynda "Shetelde Qazaqstannyń múddelerin bildirý" baǵdarlamasy boiynsha respýblikalyq biýdjetten bólingen qarajatqa Beijińniń "Dahen" advokattyq kompaniiasynan bilikti zańger jumysqa tartyldy", - delingen habarlamada.
Eske sala keteiik, 21 jastaǵy qazaq qyzy Aqjarqyn Turlybai 2014 jyldyń naýryz aiynda Qytaidyń Malaiziiamen shekarasynda esirtkimen ustalǵan bolatyn. Onyń júk sómkesinen 4,5 keli esirtki tabyldy, Aqjarqyn ol týraly bilmeitinin málimdegen. Osy is boiynsha Qytaidyń Gýanchjoý soty Aqjarqyn Turlybaidy esirtki kontrabandasymen aiyptap, ómir boiyna bas bostandyǵynan aiyrdy. 2016 jyly 7 sáýirde apelliatsiialyq satydaǵy sot Aqjarqyn Turlybaidy ómir boiyna bas bostandyǵynan aiyrý jazasyn ózgertý jáne isti birinshi satydaǵy sottyń qaraýyna jiberý týraly qaýly etken bolatyn.
