Qytai túrmesinde 8 ai jazyqsyz jatqan otandasymyz elge oraldy, dep habarlaidy Ult.kz tilshisi KTK arnasyna silteme jasap.
Kórshi eldiń quzyrly organdary Ómirbek Begalyǵa eshqandai kiná arta almai, aqyry bostandyqqa jibergen. Qazir Ómirbek sekildi shekara asyp, qapasqa túsken qandastarymyz az emes. Máselen, osydan 4 kún buryn ǵana Qytai politsiiasy Almaty turǵynyn temir torǵa jaýypty. Sebebin de eshkim túsindirmegen.
- Beikúná qol-aiaǵy bailanyp qamaýda jatady eken,
Oilanyp, óz ómirin tarazyǵa salǵan kezde,
Aqyryndap bárin túsinip qalady eken.
Bul - sherden shyqqan jyr. Ómirbek Begaly naqaqtan-naqaq segiz ai Qytaidyń qapasyna otyryp shyqqan. Torda ótken 250 kúnniń ishinde 40 keli salmaq tastapty. Byltyr EKSPO-ǵa týrist tartý maqsatynda sol jaqtaǵy áriptesterimen kelisimge otyrýǵa barǵan eken. Jolai Shyńjańdaǵy ata-anasynyń amandyǵyn bilýge at basyn burady. Ertesine qytailyq politseiler kelip, ái-sháiǵa kelmei, Qaramai qalasyndaǵy túrmege toǵytqan.
Ómirbek Begaly:
- Bir tekseremiz degen áńgimemen 8 ai qamap tastady. Sońynda eshqandai kiná tapqan joq. Biraq, kompiýterge, qara tizimge engizip qoiamyz. Qytaiǵa kele almaisyń dedi.
Aiypty da sol kúii taǵa almaǵan Qytai politseileri sońynda osylai qýlyqqa kóshken kórinedi. Aqyry týǵan jerin, ata-anasy men aǵaiyn-týysyn kórýden qalamyn ba dep qoryqqan Ómirbek olardyń aitqanyna kelisip, moraldyq shyǵyndy daýlamaǵan. Qolyna bostandyqqa jibergen qaǵazyn alyp Qazaqstanǵa qaitty. Segiz ai boiy eki kózderi tórt bolyp, saǵynyshtan sarǵaiyp, ýaiymnan úgitilgen balalarynyń endi ákelerin jandarynan bir adym attatqylary kelmeidi.
Anasyn kórýge attanǵan almatylyq Anargúl Seidahmettiń jary da 4 kún buryn Baqty keden beketinen ótkende qamalypty. Úsh jasar ulyn jetektegen Ersin Qurmettiń de qolyna ne úshin kisen salǵanyn Qytai tarapy túsindirmegen. Qytaida týǵan olar Qazaqstan azamattyǵyn byltyr alǵan eken. Almatyda shaǵyn kásipterin de bastaǵan. Bir-aq sátte basqa túsken beinet qorqynyshty tústei. Bir jasar balamen qalǵan Anargúldiń bar úmiti endi tek otandyq diplomattarda.
Anargúl Seidahmet, E.Qurmettiń jary:
- Eshqandai ol jaqta qaryzymyz joq. Basqalai da saiasatqa qatysymyz joq. Taza bolǵannan keiin qoryqpai ótip ketken ǵoi. Barlyq basshylardan, Syrtqy ister ministrliginen, barlyq kisilerden kómek suraimyn.
Syrtta quqyqtary taptalǵan qazaqtardy qorǵaý maqsatynda bertinde «Atajurt» uiymy qurylypty. Aitýlarynsha, qazir Qytaidyń ózinde bes qandasymyz esh sebepsiz túrmege jabylǵan. Odan bólek Qazaqstandaǵy týystaryna kelgen Qytaida turatyn qyspaqqa alynǵan qandastarymyz kóp eken.
Qydyráli Orazuly «Atajurt» uiymynyń tóraǵasy:
- 220-ǵa jýyq naqty sottalǵan azamattar bar. Esh sebepsiz. Sonyń kóbi Qazaqstanǵa barǵany úshin, Qazaqstandaǵy týystarymen sóileskeni úshin túrmege kirip ketken. Biz SIM aryz jazǵannan keiin, SIM Qytaidaǵy Qazaqstan elshiligine tapsyrma berip, sol elshilik sol jaqtaǵy túrmede otyrǵan Qazaqstan azamattaryna barǵan, sonyń arqasynda qazir bir aǵamyz shyǵyp keldi.
Tyrnaq astynan kir izdegen qytailyqtardyń áreketin túsiný qiyn bolyp tur. «Atajurt» uiymy jazyqsyz shekaranyń arǵy betinde túrmege jabylǵan otandastarymyz týraly málimetti jinaqtap, Syrtqy Ister ministrligine ótkizgen. Qazir otandyq diplomattar qandastardyń jaiyna qatysty Qytai biligimen kelissózdi bastap ketti.
