Búginde úlken áriptesimizge ainalyp otyrǵan Qytai tiline kóńil bólýimiz kerek. Bul jóninde Memleket basshysy «Jańa gýmanitarlyq bilim. Qazaq tilindegi 100 jańa oqýlyq» jobasy boiynsha qazaq tiline aýdarylǵan 18 kitaptyń saltanatty tusaýkeser sharasynda málimdedi, dep habarlaidy Baq.kz tilshisi.
«Qansha til bilse, adam sonshalyqty mádenietti» degen sóz bar emes pe?! Bul ońai is emes. Keide balalardy aiaisyń. Olar onsyz da táýlik boiy bos emes. Alaida, qazir olardy aiaityn bolsańyz, erteń ózińizge urysady. Bizdi, meniń zamandastarymdy múlde oqytqan joq. Basty másele ashtan ólip qalmai, aman qalý bolyp turǵanda, qaidan oqytsyn? Al qazir oqytý kerek. Kúshtep oqytý kerek. Uly filosof Shopengaýer ózine tiistini jattaǵanyna deiin ákesi ony úsh kún qamaýda ustaǵanyn jazady. Sol siiaqty, kóptegen uly kompozitorlardy da ata-analary osyndai qataldyqpen oqytqan. Múmkin olarǵa sol kezde unamaǵan bolar, al eseigen soń rahmetin aitady», - dedi Prezident.
Nazarbaev birneshe til bilý úlken múmkindikterge esik ashatynyn aitty.
«Birneshe til bilý básekelestikti arttyryp qana qoimai, úlken múmkindikterge esik ashady. Bizde myńdaǵan sheteldik kompaniia jumys jasaidy. Olardyń árqaisysy ózine jumysshy izdeidi. Al, eger, ol til bilmese, qaitip alady? Jalpy, biz myna Qytaidyń tiline de kóńil aýdarýymyz kerek. Eń úlken áriptesimiz bolyp kele jatyr. Osynyń barlyǵy adam kapitalynyń sapasyn, eldiń intellektýaldyq qýatyn bildiredi. Biz balalarymyz úsh tilde bilim alýy úshin barlyq jaǵdaidy jasap jatyrmyz. Bul balalar úshin tek jaqsy nárse, esh jamandyǵy joq. Shveitsariiada qarapaiym taksist tórt til biledi. Sebebi, onda aǵylshyn, frantsýz, nemis jáne italiia tili mindetti bolyp tabylady. Ol tilderdiń barlyǵy memlekettik tilder. Eshteńe joq, solai ómir súrip jatyr ǵoi», - dedi Elbasy.
