Pekin AQSh-tyń Taivanǵa bailanysty saiasatyn synady. Táýelsiz el retinde ishinara moiyndalǵan Taivan respýblikasynyń basshysy AQSh-qa barǵany belgili bolǵan soń Pekin arnaiy málimdeme jasady, dep habarlaidy Azattyq.
Pekinniń ekonomikalyq qysymyna qaramastan Karib aimaǵynda Taivanmen diplomatiialyq qarym-qatynasyn saqtap qalǵan birneshe memleket bar. Osy aimaqqa sapary kezinde Tsai Inven jolshybai AQSh-qa baryp, birqatar kezdesýlerge qatysqan.
AQSh-ta Tsai Inven kongress múshelerimen kezdesip, Taivan aralymen ózindik saýda qarym-qatynasyn ornatqan Vaioming shtatyna barǵan. Niý-Iorktaǵy ataqty Kolýmbiia ýniversitetinde stýdenttermen kezdesken.
Qytaidyń syrtqy ister ministri Tsai Invenniń AQSh-qa saparyn ótkir synap, Aq úi onymen "resmi bailanys ornatýdy toqtatýy kerek" dep málimdedi. AQSh memlekettik departamenti onyń "resmi emes, jeke sharýalarymen saparlap" júrgenin aitqan.
Jarty jyldan soń Taivanda jalpyhalyqtyq sailaý ótedi. Sarapshylardyń pikirinshe, sailaý Qytaidan neǵurlym táýelsiz saiasat júrgizýge talpynyp otyrǵan Taivan men Pekin arasy ýshyqqan kezben tuspa-tus keledi. Resmi Pekinniń synyna qaramastan Taivan AQSh-pen áskeri-tehnikalyq áriptestikti jalǵastyryp otyr.
Jaqynda Tramp ákimshiligi 2,2 milliard dollarǵa baǵalanǵan iri kólemde qorǵanys áskeri tehnikasyn aralǵa jetkizýdi maquldaǵan. Oǵan jaýap retinde Qytai Taivanǵa qarý-jaraq tasymaldaityn amerikalyq kompaniialarǵa tarihta tuńǵysh ret sanktsiia saldy.
