Aýǵanstanmen kórshi elderdiń kelesi aptada Pekinde ótetin kezdesýi qarsańynda, Qytai syrtqy ister ministri Van I 24 naýryzda Kabýlǵa bardy, dep habarlaidy Azattyq.
Qytai resmi túrde "Taliban" (Qazaqstanda tyiym salynǵan) úkimetin moiyndaǵan joq. Biraq onymen qarym-qatynas ornatýǵa yntaly ekenin bildirgen. Byltyr "Taliban" aýǵan úkimetin basyp alyp, elden shetel kúshteri men diplomattar ketýge asyqqanda Pekin Kabýldaǵy elshiligin jappaǵan.
"Qytai syrtqy ister ministri Islam emiraty basshylarymen kelissóz ótkiz úshin Kabýlǵa bardy" dep jazdy Talibannyń resmi ókili Ahmad Iasyr Tvitter paraqshasynda.
Aqparatqa qaraǵanda, Van I Kabýlǵa kelgennen keiin "Taliban" úkimeti syrtqy ister ministri etip taǵaiyndaǵan Ámir Han Mýttaqimen kezdesken.
Kabýlǵa barmai turyp Van I Islamabadta eki kúnge sozylǵan Islam áriptestigi uiymynyń kezdesýine qatysqan.
Aýǵanstan qazir qarjylyq jáne gýmanitarlyq daǵdarysty bastan ótkerip jatyr. BUU jáne ózge de halyqaralyq uiymdardyń málimetinshe, Aýǵanstannyń 38 mln halqynyń jartysy ashtyqqa ushyraǵan.
Qytai men Aýǵanstan shekarasynyń uzyndyǵy nebári 76 shaqyrym. Biraq Pekin soǵystan kóz ashpai kele jatqan kórshisinde turaqtylyqtyń ornaýyna múddeli. Kei sarapshylardyń aitýynsha, Qytai Aýǵanstandaǵy islam ekstremizmi men esirtkiniń Ortalyq Aziiaǵa jáne Qytaidyń batysyndaǵy Shyńjańǵa taraýyna jol bermeýdi kózdeidi.
