28 mamyrda Qytai parlamenti Gonkong qaýipsizdigi týraly daýly zań jobasyn maquldady. Bul týraly BBC saity habarlady. Qujat Gonkong aýmaǵynda Pekin ústemdigine nuqsan keltirýdi qylmys retinde qarastyrady.
Saittyń jazýynsha, qujat endi Qytai kommýnistik partiiasynyń turaqty komitetine jiberiledi. Tamyz aiynda zańǵa ainalýy múmkin.
Zań jobasynyń tolyq nusqasy jariialanbaǵan, biraq qujatqa sáikes tómendegi áreketter qylmys retinde sanalady:
- Bólshekteý - Gonkongti memleketten alshaqtatyp bólý;
- Ortalyq biliktiń ókiletine nemese bedeline nuqsan keltirý;
- Terrorizm;
- Gonkong isine kedergi keltiretin syrtqy kúshter áreketi.
21 mamyrda Búkilqytailyq kongress jiynynda Qytai "Gonkongte astyrtyn árekettiń, separatizm men sheteldiń aralasýyn boldyrmaityn" zań jobasyn usynǵan. Qujat Qytai ortalyq biliginiń qaýipsizdik organdaryna Gonkongte agenttik quryp, sol jaqtaǵy qaýipsizdikti qamtamasyz etýge múmkindik beredi. Bul Qytai ákimshilik aýmaqty tolyqtai óz baqylaýyna alýy múmkin degen alańdaýshylyqty týǵyzǵan.
Osyǵan deiin Gonkongte turǵyndar zań jobasyna qarsy shyǵyp, narazylyq bildirgen. Narazy turǵyndardyń aitýynsha, ózgerister "bir el, eki júie" printsipine qaishy. 24 mamyrda myńdaǵan adam qatysqan narazylyq kezinde shamamen 200 adam ustaldy.
Sársenbi kúni AQSh memlekettik hatshysy Maik Pompeo Gonkong Qytaidan tolyq avtonomdy bolmaǵandyqtan budan bylai AQSh-pen erekshe qatynas jasai almaidy dep málimdegen. Vashington buǵan bailanysty shara qoldaný jaǵyn qarastyryp jatyr.
Ótken aptada zań jobasyn synaǵan halyqaralyq saiasatkerler men quqyq qorǵaýshylardyń málimdemesine jaýap bergen Qytai biligi "eldiń ishki isine aralaspaý" qajettigin aitqan.
AQSh prezidenti Donald Tramp qalanyń erkindigi men sot biliginiń táýelsizdigine qaýip tónse, Gonkong álemniń qarjy ortalyǵy mártebesinen aiyrylýy múmkin dep Qytaiǵa eskertý jasaǵan.
