Bortynda úsh ǵaryshkeri bar «Shenchjoý-12» basqarylatyn ǵarysh kemesi beisenbi kúni tańerteń Qytaidyń soltústik-batysyndaǵy Gobi shólindegi «Tsziýtsiýan» ǵarysh ailaǵynan ushyryldy. Kemeniń ushyrylýynyń tikelei transliatsiiasyn Qytaidyń ortalyq telearnasy jasady, dep habarlaidy "Ult aqparat".
Apparatty orbitaǵa shyǵarý úshin CZ-2F tasymaldaýshy zymyrany qoldanyldy. «Shenchjoý-12-niń» ushyrylýy bes jylda alǵashqy ret oryn alyp otyr. Sońǵy basqarylatyn ǵarysh missiiasy 2016 jyly júzege asyrylǵan.
«Shenchjoý-12» basqarylatyn ǵarysh kemesi «Tsziýtsiýan» ǵarysh ailaǵynan 17 maýsym kúni jergilikti ýaqyt boiynsha saǵat 09:22-de ushyryldy.
Ekipaj quramynda 56 jastaǵy Ne Haishen, 54 jastaǵy Liý Bomin jáne 45 jastaǵy Tan Hýnbo bar. Haishen buǵan deiin eki márte ǵaryshqa ushsa, Bomin ǵaryshta bir ret bolǵan. Hýnbo alǵash ret ǵaryshqa kóterildi.
Olar ashyq ǵaryshqa eki ret shyǵyp, stantsiia jumysyn tekseredi jáne robot manipýliatordy synaqtan ótkizedi.
Orbitaǵa shyqqanan keiin ǵarysh kemesi avtomatty túrde «Tianhe» ǵarysh stantsiiasynyń negizgi modýline jaqyndap, onymen túiisedi. Nátijesinde osy modýlmen jáne «Tianchjoý-2» júk kemesimen orbitalyq keshen qurady. Odan keiin «Shenchjoý-12» kemesiniń bortyndaǵy ǵaryshkerler negizgi modýlge aýysyp, orbitada úsh ai merzimge qalady.
Ǵarysh ailaǵyna arnalǵan «Tianhe» bazalyq modýli ǵaryshqa osy jyldyń sáýirinde, «Tianchjoý-2» júk kemesi mamyrynda jiberilgen.
