Qytai koronavirýstyń jańa shtammynyń anyqtalýyna bailanysty Ulybritaniiamen áýe qatynasyn toqtatty. Beisenbi kúni QHR Syrtqy ister ministrliginiń resmi ókili Van Venbin osyndai málimdeme jasady, dep habarlaidy "Ult aqparat".
«Jaqynda Ulybritaniia koronavirýstyń jańa shtammy anyqtalǵanyn jariialady jáne bul jaily Dúniejúzilik densaýlyq saqtaý uiymyna habarlady. Ózge de kóptegen elder Ulybritaniiamen áýe qatynasyn toqtatý, shekarany jabý boiynsha sharalar qabyldaǵanyn málimdedi», - dedi diplomat.
«Virýstyń mýtatsiiasy men onyń yqtimal áserin eskere otyryp, adam densaýlyǵyn saqtaý maqsatynda, sondai-aq basqa memleketterdiń tájiribesin eskere otyryp, Qytai Ulybritaniiamen áýe qatynasyn toqtatady», - dep atap ótti ol.
Buǵan deiin keibir qytailyq áýe kompaniialar Qytai men Ulybritaniia arasyndaǵy reisterdi toqtatqan bolatyn. Sonyń ishinde eń iri China Southern Airlines te bar.
Ulybritaniiadaǵy QHR Elshiligi London men Manchesterdegi vizalyq ortalyqtaryn jaýyp tastady.
Ótken dúisenbide Gonkong pen Ulybritaniia arasyndaǵy áýe qatynasy da toqtatylǵan edi. Gonkongtyń densaýlyq saqtaý organdary osy aptada Ulybritaniiadan oralǵan eki stýdenttiń Ulybritaniiada tabylǵan koronavirýstyń jańa shtammymen aýyrǵanyn anyqtady.
