Qytai jaǵalaý kúzetiniń tórt kemesi Japoniia baqylaýyndaǵy Senkaký araldary aýmaǵyna endi. Bul jóninde japon aqparat quraldary jazdy, dep habarlaidy Azattyq.
Japoniianyń jaǵalaý kúzeti Qytai kemelerinen birneshe ret aimaqtan ketýdi talap etip, eskertý jasady. Shamamen bir jarym saǵattan soń Qytai kemeleri Tokio baqylaýyndaǵy aimaqtan birinen soń biri shyǵyp ketti.
Senkaký – Taivannyń soltústik–shyǵysyna qarai 170 shaqyrym jerde ornalasqan Shyǵys Qytai teńizindegi arhipelag. Araldar Japoniianyń Okinava prefektýrasyna qaraidy. Biraq oǵan Qytai men Taivan talasyp júr.
1895 jyly Japoniia Qytaidy jeńgennen keiin arhipelag Japoniiaǵa ótken. Ekinshi dúniejúzilik soǵystan keiin araldardy AQSh baqylaýyna alǵan, keiin Japoniiaǵa qaitardy. Tokio Taivanǵa daýlasý quqyǵynan bas tartqan. Sol sebepti Pekinniń oiynsha, Japoniia arhipelagty Qytai men Senkakýǵa qaitarýy tiis.
Resei Ýkrainaǵa basyp kirgennen keiin AQSh, Batys elderi jáne Japoniia Qytai Taivan daýyn retteýde "reseilik stsenariidi" qoldanýy múmkin degen qaýip aitqan. Taivan 1949 jyly azamattyq soǵys kezinde Qytaidan bólingenin málimdegen. Biraq Pekin Taivan táýelsizdigin moiyndamaidy jáne ony óziniń provintsiiasy sanaidy. Aimaqtyń ákimshilik statýsy rettelgen joq.
Okinava prefektýrasy Qytaidyń Taivanmen territoriialyq daýyna ilinip ketýden qaýiptenedi.
