Qytai naryǵy Qazaqstannyń balyǵy men jylqysyna ashyq. Bul týraly Úkimet otyrysynda QR Aýyl sharýashylyǵy birinshi vitse-ministri Qairat Aitýǵanov málim etti, dep habarlaidy QazAqparat.
«Veterinariia salasynda 25 mamyrda Qazaqstan qalǵan 5 oblys (ShQO, OQO, Almaty, Jambyl, Qyzylorda oblystary) úshin aýsyldan taza aimaq mártebesin aldy. Bul sheshim úshin Halyqaralyq epizootiialyq biýroǵa múshe 180 elden delegattar daýys berdi. Bul janýarlar men ósimdikterden alynatyn ónimder eksportyn ulǵaitýǵa jaqsy múmkindik beredi. Qytai naryǵy qazaqstandyq balyq pen balyq ónimderi, jylqy tuqymdas asyl tuqymdy janýarlar, sondai-aq bal jáne bal ara sharýashylyǵy ónimi úshin ashyq. Maýsym aiynda Muzdatylǵan qoi eti boiynsha hattamaǵa qol qoiý josparlanýda, atalǵan elge taýarly jylqylardy da tasymaldaý sharttary kelisilýde», - dep toqtaldy Aitýǵanov.
Onyń sózine qaraǵanda, Iranǵa tońazytylǵan qoi eti men tiri qoilardy eksporttaýǵa veterinariialyq sertifikattardyń jobalary kelisildi jáne muzdatylǵan qoi eti boiynsha jumys júrgizilýde. Birikken Arab Ámirlikterine iri jáne usaq qara maldy, taýyq jumyrtqasyn tasymaldaýǵa veterinariialyq sertifikattarǵa qol qoiyldy.
«Budan basqa, Izrail jáne Saýd Arabiiasynyń veterinariialyq qyzmetterimen janýarlardan alynatyn qazaqstandyq ónimniń eksportyn ashý boiynsha jumys júrgizilýde», - dedi birinshi vitse-ministr.
Budan buryn habarlanǵandai, mamyr aiynda Qazaqstan aýsyldan taza aimaq retinde moiyndalǵan bolatyn.
