Qytai astanasynda Shanhai yntymaqtastyq uiymy (ShYU) elderiniń qatysýshylaryna arnalǵan qytai kalligrafiiasynyń 4-baiqaýynyń jeńimpazdaryn marapattaý rásimi ótti. Aǵymdaǵy jyldyń 10 aiynda osy sharaǵa 1600 qatysýshydan 2 myńnan astam jumys kelip tústi, dep habarlaidy QazAqparat.
Oǵan Qazaqstan, Qyrǵyzstan, Tájikstan, Ózbekstan, Resei, Belarýs, Úndistan, Pákistan, Ázerbaijan, Armeniia, Mońǵoliia jáne basqa elderdiń qylqalam sheberleri qatysty. Olardyń arasynda birinshi oryn alǵan - 4, ekinshi oryn ielengen - 8 jáne úshinshi oryndy jeńip alǵan 19 jeńimpaz anyqtaldy.
Sondai-aq «biylǵy» jáne ótken jylǵy jeńimpazdardyń týyndylary qoiylǵan kórme ótti. Onda Shanhai qalasyndaǵy Shyǵys Qytai pedagogikalyq ýniversitetiniń stýdenti Dana Toibaǵarovanyń jumysy erekshe ataldy. Ol 2018 jyly qytai kalligrafiiasynyń 3-baiqaýynda 1-oryndy jeńip alǵan bolatyn.
Baiqaýdy qytai mádenieti men QHR-nyń ShYU memleketteriniń mádeni-gýmanitarlyq yntymaqtastyǵyn nasihattaý maqsatynda «Jenmin hýabao» baspasy jáne Qytai Aqparattyq Internet-ortalyǵy uiymdastyrdy.
Eske sala keteiik, atalǵan baiqaýdyń ótken jylǵy finalisteriniń qatarynda QHR JOO-da bilim alyp jatqan qazaqstandyq stýdentter - Qanat Omar, Erǵali Saianuly, Rýslan Tólenov jáne Madina Balaǵulova bar.
Qytai kalligrafiiasy - bul mátinniń maǵynasyn ǵana emes, onyń kóńil-kúiin kózben kórsetýge múmkindik beretin ierogliftik beineleý óneri. Hattyń bul túri qaǵazda rýh pen qozǵalys úilesimin kórsetýge, oqyrmannyń nazaryn aýdarýǵa, tipti oǵan emotsiialyq áser berýge arnalǵan erekshe estetikalyq quramymen erekshelenedi. Shyǵysta kalligrafiiaǵa qashan da erekshe mán bergen. Olar mundai qyzmet adamnyń adamgershilik qasietterin joǵary baǵalap tárbieleýge, sondai-aq rýhani damý kezinde oǵan kómektesýge qabiletti dep esepteidi.
