Qytai Halyq Respýblikasynyń Qazaqstandaǵy Tótenshe jáne ókiletti elshisi Chjan Hanhýeidyń aitýynsha, eki eldiń arasyndaǵy ózen-sýlardy bólý máselesin sheshý úshin naqty printsipterdi anyqtap alǵan jón, dep habarlaidy Ult.kz tilshisi QazAqparat agenttigine silteme jasap.
«Árine, Qytai men Qazaqstan arsyndaǵy transshekaralyq ózender kóp. Sonyń barlyǵy - ortaq bailyq, qudaidyń eki halyqqa bergen nesibesi. Ol - bir. Ekinshiden, biz osy másele boiynsha tyǵyz jumys istep kelemiz. Ashyǵyn aitaiyn, ondai másele bizdiń barlyq kórshiles elderimizben bar. Alaida tek Qazaqstanmen ǵana ózen-sýlardy bólý boiynsha kelissózderdi bastap otyrmyz. Iá, ony kesh bastadyq, biraq bárinen buryn naqty bir nátijege jetetin túrimiz bar. Ol kelissózder sátti aiaqtalady dep bilemin. Biz árqashan Qazaqstannyń múddesin eskeretin bolamyz. Qytaidyń basshylyǵy áý basta eshqashan qazaq halqynyń quqyqtaryna qysym jasamaitynyna ýáde bergen», - dedi Hanhýei myrza búgin Astanada ótken baspasóz máslihatynda.
Onyń aitýynsha, búginde transshekaralyq ózen sýlaryn bólý kezinde ǵylymi turǵyda sol sýdyń naqty kólemin eseptep shyqqan jón. Qazirgi jahandyq jylymyqty da eskerý kerek. Sýdy bólýdiń naqty printsipterin anyqtaý qajet.
«Máselen, Qazaqstanda qurǵaqshylyq bolǵanda biz ózimizdegi sý toǵandaryn birden ashyp tastap, barlyq sýdy jiberdik. Sonda sizder bir ǵana qońyraý jasadyńyz. Biz bolsaq, birden sý toǵandaryn bosattyq. Mine, dostyq, ózara senim dep osyny ait. Qazirgi kelissózder dostyq pen ózara senimge negizdelýi kerek», - dep atap kórsetti elshi.
Aita keteiik, búgingi baspasóz máslixatynda Chjan Hanxýei «Astanadaǵy EKSPO kezinde qytailyqtarǵa jatyn oryndar jetispeýi múmkin» degen oiyn jetkizdi.
Elshi «qytailyq qater» týraly mifti joqqa shyǵarýǵa tyrysty.
Sondai-aq ol qazaqstandyq ánshi Dimash Qudaibergenniń Qytaidyń mádeni naryǵyndaǵy tańǵajaiyp jetistigine qatysty óz pikirin bildirdi.
