Qytaidyń Qazaqstandaǵy elshisi Chjan Siao Jańaózende ótken mitingke qatysty túsinikteme berdi, dep habarlaidy Sputnik Qazaqstan.
"Osy mitingte aitylǵan oilar men sózder – sondai kúlkili. Olar sol arqyly Qazaqstannyń úkimettik organdarynyń quzyrettiligi men kásibiligine kúmán keltiredi. Meniń olarǵa bir ǵana suraǵym bar: "senderdiń esteriń durys pa?", - dedi Siao Jańaózende Qytai zaýyttarynyń salýyna qarsy shyqqan narazy topqa qatysty pikir bildirip.
Osy oraida elshi Qazaqstan men Qytai birlesip iske asyratyn 55 jobanyń birin mysalǵa keltirdi.
"Shymkenttegi munai óńdeý zaýytyn alaiyq. Men oǵan byltyr baryp kelgen edim. Zaýyt óte eski, keńes zamanynda salynǵan. Eshqandai zamanaýi tehnologiialyq normalarǵa sai emes edi. Qalanyń aýasyn, negizinen, osy zaýyt lastaityn. Biraq, bizdiń birlesken kúsh-jigerimizdiń arqasynda kásiporyn tolyǵymen jańardy. Tolyq qýattylyqqa kóshti. Sonyń arqasynda qazir Qazaqstan ózin ǵana sapaly ári otandyq benzinmen qamtamasyz etip otyrǵan joq, janar-jaǵarmaidy kórshi elderge de ekporttai bastady. Resmi derekke súiensek, búginde TMD elderimen salystyrǵanda, eń arzan benzin Qazaqstanda", - dedi ol.
Chjan Siaonyń aitýynsha, Qytai máselesi Qazaqstanda burynnan bar, ábden jaýyr bolǵan taqyryp.
Onyń paiymynsha, mitingke shyqqan narazy toptyń artynda eki eldiń qarym-qatynasyna syzat túsirgisi keletin nebir kúshter bar.
"Biraq men olardyń bul áreketinen túk shyqpaitynyn aitqym keledi. Óitkeni olar aram piǵylmen, geosaiasi múddeni kózdep áreket etip otyr", - dedi Siao.
Elshi "Qytai Qazaqstandy jaýlap alǵaly jatyr, óz halqyn kóshirip ákelmekshi" deýge esh negiz joq.
"Resmi aqparatqa súiensek, Qytai Qazaqstan ekonomikasyna investitsiia quiǵan elderdiń úzdik úshtigine de enbegen. Sondyqtan munyń bári bos sóz", - dep túiindedi ol.
Aita ketsek, 2 qyrkúiekte Jańaózende júzdegen adam ákimdiktiń aldyna jinalǵan edi. Olar Qazaqstanda qytailyq zaýyttardyń qurylysyna tyiym salýdy talap etken.
Keiinirek syrtqy ister ministriniń orynbasary Ermek Kósherbaev brifing ótkizip, Qytaidyń eski zaýyttary Qazaqstanǵa kóshiriledi degen aqparattyń shyndyqqa janaspaitynyn málimdegen bolatyn.
Al búgin ishki ister ministri Erlan Turǵymbaev Jańaózende bári tynysh ekenin aitty.
