Qytai AQSh-taǵy prezident sailaýynyń jeńimpazy atanǵan Djo Baidendi jeńisimen quttyqtady. Pekin Baidendi sailaý jeńimpazy retinde tanylǵannan keiin shamamen bir apta ótken soń quttyqtap otyr. Al Resei resmi qorytyndyny kútip otyr.
“Biz Amerika halqynyń tańdaýyn qurmetteimiz. Baiden myrza men Harris hanymdy (jańadan sailanǵan vitse-prezident - red.) quttyqtaimyz. AQSh sailaýynyń nátijesi AQSh zańy men tártibine sáikes anyqtalatynyn túsinemiz” dedi Qytai syrtqy ister ministrliginiń resmi ókili Van Venbin 13 qarasha kúngi baspasóz jiyny kezinde.
Qytai osyǵan deiin Baidendi quttyqtamaǵan Resei, Meksika siiaqty sanaýly alyp memleketterdiń qatarynda bolǵan edi.
Sailaýda jeńilgenin moiyndamaǵan Tramp keibir shtattarda “zańsyzdyqtar bolmaǵanda jeńetin edim" dep málimdegen. Biraq qazirgi prezident pen jaqtastary oǵan eshqandai dálel-aiǵaq keltirmegen. Olardyń aryzdaryn sottardyń basym bóligi keri qaitarǵan.
Tramp tusynda AQSh pen Qytai arasyndaǵy jaǵdai qatty ýshyqty, ásirese saýda-sattyq, tehnologiia qaýipsizdigi, koronavirýs máseleleri boiynsha eki alyp memleket arasynda túitkilder kóp.
Qytaidyń memlekettik aqparat quraldary 9 qarashada Baiden ákimshiligi tusynda qarym-qatynas qalpyna túsip, saýda-sattyq máseleleri sheshilýi múmkin degen sipatta maqalalar jariialaǵan.
Alaida Qytaidyń memlekettik Global Times basylymynyń jazýynsha, AQSh-tyń Shyńjańdaǵy qýdalaý men Gonkong máselelesi boiynsha Pekinge qysymdy báseńdetýi neǵaibyl, sol sebepti Pekinge Baiden komandasymen muqiiat jumys isteýine týra keledi.
Kremldiń resmi ókili Dmitrii Peskov 13 qarasha kúni RT-Russia bergen suhbatynda Resei AQSh-taǵy prezident sailaýynyń resmi qorytyndysyn kútedi dep aitqan.
“Bul jái ǵana qurmet seziminen týǵan únsizdik. Amerikalyq BAQ emes, amerikalyqtardyń ózderi sailaǵan prezidenti týraly aitatyn sátti kútip otyrmyz” degen.
AQSh-ta 3 qarashada ótken prezident sailaýynyń resmi qorytyndysy áli shyqpaǵanmen Amerika aqparat quraldary Baiden jeńiske jetti dep boljaǵan. Kóptegen álem basshylary Baidendi quttyqtap ta úlgerdi.
Keibir shtattarda daýys sanaý endi aiaqtaldy. Sońǵy málimet boiynsha, Tramp sailaýshylar alqasynyń 217 daýysyna ie bolǵan. Biraq qarsylasy, demokrat Djo Baidennen báribir aitarlyqtai artta keledi. Qazir Baidende 279 daýys bar. Ol prezident retinde sailaný úshin qajet mejeden (270 daýys) óte alǵan.
Osy apta sońynda AQSh-taǵy prezident sailaýynyń qaýipsizdigine jaýapty federaldyq vedomstvonyń joǵary laýazymdy ókilderi "sailaý nátijesin burmalaý" siiaqty aqparatqa dálel tabylmaǵanyn málimdedi. Olar Djo Baiden biýlletenderdi urlaý jáne burmalaýdyń arqasynda jeńiske jetti dep tujyrymdaǵan Tramp pen respýblikashyldardyń tujyrymyn joqqa shyǵardy.
