Qazaqstanǵa kelgenine úsh kún bolǵan qytailyq dáriger-sarapshylar búgin koronavirýspen kúresip júrgen qazaqstandyq dárigerler kómektesýdi kózdeitin birneshe mańyzdy sharaǵa qatysty, dep habarlaidy "Ult aqparat".
Meimandar búgin Ulttyq ǵylymi kardiohirýrgiia ortalyǵy men «Ramada Plaza» qonaq úiinde boldy. Odan bólek, intensivti terapiia dárigerlerine onlain rejimde trening ótkizdi. Treningtiń negizgi taqyryby – dene qyzýy joǵary naýqastardy tekserý protsedýrasy, diagnozy naqtylanǵan patsientti infektsionist Lý Siaobo usynǵan ádispen emdeý, sonymen qatar reanimatolog Chjang Dachýannyń jansaqtaý bóliminde jatqan jaǵdaiy aýyr naýqastardy emdeý tásili.
Treningke densaýlyq saqtaý salasyndaǵy 483 maman qatysty. Dáris aiaqtalǵan soń qazaqstandyq dárigerler kókeidegi suraqtaryn qoiyp, jaýap aldy.
Osy kúni qytailyq dárigerler videokonferentsiia arqyly koronavirýs infektsiiasyna shaldyqqandardy emdep júrgen qazaqstandyq dárigerlerge eki saǵattyq seminar ótkizdi. Onda mańyzdy eki taqyryp qaraldy: reanimatolog Siý Minniń ádisimen hali nashar naýqastarǵa diagnoz qoiý jáne emdeý, sondai-aq pýlmonolog Chjý Iýlýn usynǵan tásil boiynsha naýqasqa kompiýterlik tomografiia arqyly diagnoz qoiý. Seminarǵa 333 dáriger qatysty.
Keshkisin Qytaidan kelgen mamandar Qazaqstannyń óńir-óńirindegi qoǵamdyq densaýlyq saqtaý basqarmalarynyń qatysýymen onlain kezdesý ótkizip, COVID-19 infektsiiasyn talqylady. Ile-Qazaq avtonomdy okrýgi gýbernatorynyń orynbasary Ershat Tursynbai men nefrolog dáriger Lý Chen ulttyq jáne mýnitsipaldyq deńgeide koronavirýstyń aldyn alý men baqylaýda ustaýdyń qytailyq mehanizmin tanystyrdy.
Aita keteiik, mundai treningter men seminarlar aldaǵy ýaqytta kún saiyn ótkiziledi. Densaýlyq saqtaý ministrligi koronavirýspen kúresip júrgen qazaqstandyq dárigerlerdi osy sharalarǵa qatysyp, tájiribe almasýǵa shaqyrady.
