Beijińde Qysqy Olimpiada oiyndarynyń uiymdastyrý komiteti qatysýshylarǵa koronavirýsqa bailanysty qoiylǵan talaptardy jeńildetti. Bul týraly Halyqaralyq Olimpiada komitetiniń (HOK) málimetinde aitylǵan, dep habarlaidy QazAqparat.
HOK málimdemesine sai, PTR-test nátijesi arqyly virýsty anyqtaý merzimi azaitylyp, «jaqyn aralasý» merzimi 14 kúnnen 7 kúnge deiin qysqarady.
Virýs anyqtalǵan adamdar arnaiy bólingen «izoliatorlarǵa» karantinge ornalastyrylady. 10 kún karantinde otyrǵannan keiin olardan KVI simptomdary baiqalmai, PTR-test úsh kún qatarynan teris nátije kórsetken jaǵdaida, olar buryn brondalǵan oryndaryna ornalasa alady.
«Ózgerister (2022 jylǵy Olimpiada oiyndarynda koronavirýsqa qarsy kúres erejeleri) birden kúshine enedi. Olar qazirgi jaǵdaiǵa orailastyrylyp, Olimpiada qatysýshylaryn qoldaý maqsatynda jasalǵan», - delingen HOK habarlamasynda.
Koronavirýs anyqtalǵan qatysýshylar úshin «Beijiń-2022» uiymdastyrý komiteti HOK-pen birge qysqa ýaqytta úige oralýǵa múmkindik beretin bólek sharalar qarastyryp jatyr. Olar týraly jeke habarlanatyn bolady.
«Beijiń-2022» uiymdastyrý komiteti sportshylar men resmi tulǵalar, Oiyndarǵa kelgen múddeli taraptar ókilderiniń arasynda virýs juqtyrǵandar boiynsha statistika júrgize bastady. 24 qańtardaǵy jaǵdai boiynsha koronavirýs juqtyrǵandar sany 78-ge jetken.
Qytailyq BAQ-tyń habarlaýynsha, Qazaqstan quramasy Beijińge 27 qańtarda ushpaq.
XXIV qysqy Olimpiada oiyndary Beijińde 2022 jyldyń 4-20 qańtary aralyǵynda ótedi.
