بەيجٸڭدە قىسقى وليمپيادا ويىندارىنىڭ ۇيىمداستىرۋ كوميتەتٸ قاتىسۋشىلارعا كوروناۆيرۋسقا بايلانىستى قويىلعان تالاپتاردى جەڭٸلدەتتٸ. بۇل تۋرالى حالىقارالىق وليمپيادا كوميتەتٸنٸڭ (حوك) مەلٸمەتٸندە ايتىلعان, دەپ حابارلايدى قازاقپارات.
حوك مەلٸمدەمەسٸنە ساي, پتر-تەست نەتيجەسٸ ارقىلى ۆيرۋستى انىقتاۋ مەرزٸمٸ ازايتىلىپ, «جاقىن ارالاسۋ» مەرزٸمٸ 14 كٷننەن 7 كٷنگە دەيٸن قىسقارادى.
ۆيرۋس انىقتالعان ادامدار ارنايى بٶلٸنگەن «يزولياتورلارعا» كارانتينگە ورنالاستىرىلادى. 10 كٷن كارانتيندە وتىرعاننان كەيٸن ولاردان كۆي سيمپتومدارى بايقالماي, پتر-تەست ٷش كٷن قاتارىنان تەرٸس نەتيجە كٶرسەتكەن جاعدايدا, ولار بۇرىن بروندالعان ورىندارىنا ورنالاسا الادى.
«ٶزگەرٸستەر (2022 جىلعى وليمپيادا ويىندارىندا كوروناۆيرۋسقا قارسى كٷرەس ەرەجەلەرٸ) بٸردەن كٷشٸنە ەنەدٸ. ولار قازٸرگٸ جاعدايعا ورايلاستىرىلىپ, وليمپيادا قاتىسۋشىلارىن قولداۋ ماقساتىندا جاسالعان», - دەلٸنگەن حوك حابارلاماسىندا.
كوروناۆيرۋس انىقتالعان قاتىسۋشىلار ٷشٸن «بەيجٸڭ-2022» ۇيىمداستىرۋ كوميتەتٸ حوك-پەن بٸرگە قىسقا ۋاقىتتا ٷيگە ورالۋعا مٷمكٸندٸك بەرەتٸن بٶلەك شارالار قاراستىرىپ جاتىر. ولار تۋرالى جەكە حابارلاناتىن بولادى.
«بەيجٸڭ-2022» ۇيىمداستىرۋ كوميتەتٸ سپورتشىلار مەن رەسمي تۇلعالار, ويىندارعا كەلگەن مٷددەلٸ تاراپتار ٶكٸلدەرٸنٸڭ اراسىندا ۆيرۋس جۇقتىرعاندار بويىنشا ستاتيستيكا جٷرگٸزە باستادى. 24 قاڭتارداعى جاعداي بويىنشا كوروناۆيرۋس جۇقتىرعاندار سانى 78-گە جەتكەن.
قىتايلىق باق-تىڭ حابارلاۋىنشا, قازاقستان قۇراماسى بەيجٸڭگە 27 قاڭتاردا ۇشپاق.
XXIV قىسقى وليمپيادا ويىندارى بەيجٸڭدە 2022 جىلدىڭ 4-20 قاڭتارى ارالىعىندا ٶتەدٸ.
