Úrimjidegi meshitte juma namazyna jinalǵan er kisiler men balalar. Qytai, mamyr 2014 jyl (Kórneki sýret):
Qytaidyń soltústik-batysyndaǵy Shyńjań uiǵyr avtonomiialyq aýdanynyń biligi jańa týǵan balaǵa ádette musylmandar kóp qoldanylatyn dini maǵynasy bar esimderdi qoiýǵa tyiym saldy. Tyiym salynǵan esimder tizimine ondaǵan esim engizilgen.
25 sáýirde Azat Aziia Radiosynyń efirinde sóilegen Shyńjań ákimshiliginiń resmi ókili batystyq BAQ-ta jariialanǵan, Islam, Quran, Mekke, Jihad, Imam, Qajy, Medine siiaqty esimder Qytaida biliktegi kommýnistik partiianyń tyiym salynǵan esimder tizimine kirgizilgeni týraly aqpardy rastady. Qytai kommýnistik partiiasy tyiymdy taiaýda jariialaǵan "Etnikalyq azshylyq ókilderine esim berý erejeleri" dep atalatyn qujaty negizinde salǵan. Shyńjań aimaǵynyń ákimshilik ortalyǵy - Úrimji qalasy politsiiasynyń ókili musylmansha esim qoiylǵan balalardyń densaýlyq saqtaý jáne bilim berýge qol jetkizetin memlekettik tirkeý júiesinen shyǵarylatynyn habarlady.
Ereje negizinen aimaqtyń islamdy ustanatyn baiyrǵy turǵyndaryna áser eteiin dep tur. Aimaqta islamdy ustanatyn kem degende 10 million uiǵyr, 1,5 million qazaq, 150 myńǵa tarta qyrǵyz, bes myń tatar, tórt myń tájik pen myńǵa tarta dúngen turady.
Uiǵyrlar uzaq ýaqyttan beri Qytai biliginiń ózderine qarsy qýǵyndaý saiasatyn ustanady dep aiyptap keledi. Qytai kommýnistik partiiasy Shyńjań aimaǵyn qatań baqylaýda ustaidy. Bul aimaq týraly aqparatty táýelsiz aqparat kózderinen anyqtaý óte qiyn.
