4 tamyzda Pekin AQSh-ty qytailyq TikTok jelisine "ashyqtan-ashyq qysym jasap otyr" dep aiyptady. Buǵan deiin AQSh prezidenti Donald Tramp TikTok qosymshasy amerikalyq kompaniialarǵa satylýy tiis dep málimdegen edi.
Qytailyq TikTok jelisi AQSh-ta ulttyq qaýipsizdik máselesine bailanysty kúdikke ilingen, sebebi áleýmettik jeli qoldanýshylardyń jeke aqparatyn jinap, Qytai úkimeti talap etken jaǵdaida Pekinge tapsyrýǵa zańmen mindettelgen. 3 tamyzda Tramp TikTok-ke kásiporyndy amerikalyq kompaniialarǵa satý úshin alty apta ýaqyt bergen. Tramp onyń amerikalyq Microsoft-ke satylýyna qarsy emestigin de bildirgen.
Al Qytaidyń syrtqy ister ministri bul naryq jáne Dúniejúzilik saýda uiymynyń ashyqtyq jáne alalamaý printsipterine qaishy keledi dep málimdedi.
Donald Tramp osy aptada Microsoft atqarýshy direktory Satia Nadellamen kásiporyndy satyp alýǵa bailanysty yqtimal kelisim jaily sóileskenin habarlaǵan. Tramp eger TikTok-ty Microsoft nemese AQSh-tyń ózge kompaniiasy satyp almasa, "AQSh naryǵynan ketedi" degen edi. Microsoft kompaniiasy áleýmettik jeliniń qaýipsiz ekenine jáne ekonomikalyq turǵyda tiimdi ekenine tolyq kóz jetkizgennen keiin kelisim jasasýy múmkin ekenin málimdegen.
