QR IIM Ákimshilik politsiia komiteti tóraǵasynyń orynbasary Serik Túsipov qysta alys jolǵa shyǵatyn júrgizýshiler qandai qural-jabdyqtardy alyp júrýi kerektigin aityp berdi, dep habarlaidy QazAqparat.
«Qystygúni jyldamdyq rejimin saqtaý kerek. Óitkeni tejegishti basqan kezde kólik syrǵýy múmkin. Jyldamdyqty durys tańdamai, odan soń kenet tejegish basylsa, kólik tizginge kónbei, munyń sońy jol-kólik oqiǵasyna aparyp soqtyrýy yqtimal. Odan bólek, ońǵa nemese solǵa qaýipsiz burylý úshin avtokólikter arasyndaǵy qashyqtyqty jáne ekijaqty aralyqty saqtaý kerek», - dedi IIM-niń baspasóz máslihatynda Serik Túsipov.
Kólik qozǵalysyna áser etetin taǵy bir jaǵdai – joldyń «muzdy aryqqa» ainalyp shyǵa kelýi. Iaǵni, jol jiegin qar basyp qalatyndyqtan, qozǵalys aýmaǵy tarylady. Osynyń bári de jyldamdyq rejimine áser etedi.
«Kólik júrgizýshisi jol apatyna tap bolmas úshin atalǵan erejelerdiń bárin saqtaýy kerek. Qarasha aiy bastalǵaly elde 406 jol-kólik oqiǵasy tirkeldi, 95 adam kóz jumyp, 472 adam ártúrli dene jaraqatyn aldy», - dedi ol.
Serik Túsipov alys jolǵa shyǵatyn júrgizýshilerge qandai quraldardy alyp júrýi kerektigin eskertti. Atap aitqanda, mundai júrgizýshiler tirkeitin tros, kúrek, syrǵýǵa qarsy shynjyr (júk kólikteri men avtobýstar úshin), jyly kiim men aiaq kiim, jetkilikti deńgeide janar-jaǵarmai bolǵany abzal.
