Qazaqstanda qysqartylǵan jumyspen qamtýǵa kóshken jaǵdaida eń tómengi jalaqy mólsherinde jalaqynyń bir bóligin óteý nemese sýbsidiialaý tetigin engizilýi múmkin. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Biz úshin eńbek naryǵyndaǵy ekinshi qater - bul ósip kele jatqan jumys kúshiniń oǵan keltiretin qysymy. Aldaǵy 5 jylǵa taldaý jasap kórdik. jastardyń eń naryǵyna jyl saiynǵy aǵyny 2025 jylǵa qarai 256 myń adamǵa deiin ósedi dep boljanýda jáne jalpy eńbekke qabiletti halyqtyń sany 12,1 mln adam jetetindigi kútiledi. Búginde eńbekke qabiletti halyq sany - 11,4 mln adam», - dedi ministr Májilistegi Úkimet saǵatynda.
Onyń aitýynsha, tiisti sharalar qabyldanbasa 2022 jyldan bastap jumys oryndaryn qurý ósimi halyqty jumyspen qamtýǵa jetkiziliksiz bolady. Sóitip, 2025 jylǵa qarai jumys tapshylyǵy 87 myńǵa jetýi múmkin.
«Sol sebepti aldaǵy kezeńde jumys oryndaryn qosymsha qurý qajettiligi kúrt artyp otyr. Eger karantin qaita engizilip jatsa, onyń áseri jumyskerlerdiń bosatylýy men tabystarynyń azaiýyna alyp kelýi múmkin. Sondyqtan shuǵyl jáne júieli sharalar qabyldaýǵa daiyn bolýymyz qajet. Onyń ishinde «Jumyspen qamtý» jol kartasyn jalǵastyryp, infraqurylymdyq jobalar arqyly jumys oryndaryn saqtaý jáne qurý sharalary, «Eńbek« baǵdarlamasy aiasynda sýbsidiialanatyn jumys oryndaryn kóbeitý, tolyq emes nemese qysqartylǵan jumyspen qamtýǵa kóshken jaǵdaida eń tómengi jalaqy mólsherinde jalaqynyń bir bóligin óteý nemese sýbsidiialaý tetigin engizý, karantin kezeńinde jumyssyzdar úshin jumystan aiyrylý boiynsha tólemderdi arttyrý jóninde usynystar engizýdi josparlap otyrmyz. Engizýimiz múmkin»,- dedi Birjan Nurymbetov.
