QR Eńbek jáne halyqty áleýmettik qorǵaý ministri Birjan Nurymbetov qysqartýǵa tap bolǵan jumysshylardyń quqyqy jóninde túsinikteme berdi, dep habarlaidy QazAqparat.
Onyń aitýynsha, jumys berýshi qyzmetkerge qysqartý týraly bir ai buryn eskertýge mindetti jáne bir ailyq eńbekaqy kóleminde ótemaqy tóleýi tiis.
«Qazirgi ýaqytta biz ózimiz jumysshylardyń qysqarýy múmkin degen jaǵdaiǵa monitoring júrigizip otyrmyz. Osy jyldan bastap, Memlekettik saqtandyrý týraly zańǵa ózgerister engizip úlgerdik. Bul ózgerister boiynsha, eger jumystan aiyrylyp qalsańyz, onyń sebebine qaramastan Memlekettik saqtandyrý qorynan 6 ai boiy áleýmettik tólem alýǵa quqyńyz bar», - dedi ministr Ortalyq kommýnikatsiialar qyzmetinde ótken brifingte.
Ol áleýmettik tólemniń mólsheri joǵaltqan jalaqynyń orta eseppen 40 paiyzyn quramaq.
«Bul úshin jumystan aiyrylyǵan azamat qashyqtyqtan jumyspen qamtý ortalyǵyna jumyssyz retinde tirkelýi jetkilikti. Keiinirek proaktivti túrde áleýmettik tólem taǵaiyndalyp, alty ai boiy tólenedi», - dedi B. Nurymbetov.
Aita keteiik, 2020 jyldyń 1 qańtarynan bastap, mindetti áleýmettik saqtandyrý týraly zańnamaǵa ózgerister enip, áleýmettik tólemderdiń kólemi artty.
Buǵan deiin ministr qashyqtyqtan jumys isteý múmkindigi bar barlyq kásiporyndar men mekemeler osy rejimge aýysýǵa mindetti ekenin málimdedi.
Sondai-aq, jumys kólemi shekteletin bolsa, jumys berýshiler ózderiniń buiryǵymen qysqartylǵan jumys rejimine kóshýge quqyly.
Tótenshe jaǵdaiǵa bailanysty QR Prezidenti Qasym-Jomart Toqaev el halqyna úndeý joldady. Úndeýdiń tolyq mátini arnaiy jariialandy.
