Qys jaqyndaǵan saiyn soltústik jarty sharda, ásirese Eýropa men Soltústik Amerikada COVID-19 juqtyrǵandar sany ósýde. Kelesi ailarda jaǵdai kúrdeli bolady. Bul týraly DDSU bas direktory Tedros Gebreiesýs málim etti, dep habarlaidy "Ult aqparat" BUU Jańalyqtar ortalyǵyna silteme jasap.
Tedros Gebreiesýs uiymnyń qoldaýymen pandemiiamen kúreste halyqaralyq yntymaqtastyqty nyǵaitýǵa baǵyttalǵan #WeAreFamily (Biz – otbasymyz) naýqany bastalǵanyn habarlady.
«We Are Family» («Biz – otbasymyz») tanymal ániniń arnaiy nusqasyn beinerolikpen shyǵaramyz. Onda ataqty adamdar, dárigerler, basshylar jáne jurtshylyq ókilderi bul ándi birge oryndaidy.
Naýqan aiasynda búkil álemdegi adamdarǵa jaqyndarymen jáne dostarymen birge bul ándi shyrqap, áleýmettik jelilerge beineler júkteý usynylady.
Jańa bastamanyń maqsaty – densaýlyq saqtaý salasyndaǵy jahandyq problemalardy sheshý úshin qarajat jinaý, halyqaralyq yntymaqtastyq ornatý jáne qaýipti virýspen kúreste árkimniń jaýapkershiligin arttyrý», - dedi DDSU direktory.
DDSU basshysy búgingi tańda bul ózara kómek burynǵydan da qajet dep sanaidy, óitkeni aýrýǵa shaldyǵýshylar sany tez ósýde, iaǵni aýrýhana oryndaryna, sonyń ishinde jansaqtaý bólimshelerine muqtaj adamdardyń sany artyp keledi.
«Soltústik jarty sharda qys túsip jatqanda, biz aýrýdyń kóbeigenin baiqaimyz, ásirese Eýropa men Soltústik Amerikada», - dedi DDSU basshysy. Ol pandemiianyń soltústik jarty sharda aýyr kezeńge aiaq basqanyn, aýrý juqtyrý deńgeii indettiń sharyqtaý shegi bolǵan naýryz aiyndaǵydan úsh esege joǵary ekenin qaitalap aitty.
