Qyzylorda oblysynyń ákimi Qyrymbek Eleýuly Kósherbaevqa «Batys Qazaqstan oblysynyń Qurmetti azamaty» ataǵy tabys etildi. Atalmysh ataqty tabys etý rásimin Qyzylorda oblystyq máslihatynyń kezekten tys XX sessiiasynda Batys Qazaqstan oblysy ákiminiń orynbasary Ǵabidýlla Ospanqulov oryndady, dep habarlaidy QazAqparat tilshisi.
«Qyrymbek Eleýuly Batys Qazaqstan oblysynda ákim qyzmetin 2000-2003 jyldary atqardy. Osy jyldar ishinde júzege asqan igilikti ister jaiynda batys jurty saǵynyshpen aitqanyna kýámiz. Qashanda Aqjaiyq jurtynyń Qyrymbek Eleýulyna degen ystyq yqylasy erekshe», - dedi Batys Qazaqstan oblysy ákiminiń orynbasary Ǵ. Ospanqulov.
Sol bir kezeńde Qyrymbek Eleýuly Aqjaiyq óńirine investorlar tartý, óńirdiń infraqurylymyn damytý, áleýmettik jaǵdaiyn kóterý, oblys ortalyǵynan bastap, alys-jaqyn eldi mekenderdiń jolyn jańartý, gazben qamtamasyz etý jumystaryn aiaqtaý siiaqty kúrdeli isterdi atqarýǵa uiytqy boldy. Úsh jylda árbir aýylǵa deiin gaz tartylyp, jergilikti turǵyndar sol igilikti istiń sharapatyn búgingi kúnge deiin kórip keledi.
Osy oraida Batys Qazaqstan oblysynyń ákimi Altai Kólginov quttyqtaý hat joldaǵan. Onda «Oblystyń «Qurmetti azamaty» atanýyńyz - óńirimizde qalǵan «Kósherbaev qoltańbasynyń» qoǵamdyq moiyndalýy. Jańa myńjyldyqtyń bas kezinde Oral óńiriniń gúldenýine qosqan úlesińiz úshin Sizge óńir turǵyndarynyń atynan alǵys bildiremin!» - dep jazylǵan.
Batys Qazaqstan oblysy ardagerler keńesiniń tóraǵasy Abat Esenǵaliev sol jyldary Bókei ordasy tarihi kesheni, táýelsizdik tarihynda jańadan teatr ǵimaratyn salý isinde Qyrymbek Kósherbaev zor eńbek sińirgenin atap ótti. Pedagogikalyq institýtqa Mahambettiń, aýylsharýashylyǵy institýtyna Jáńgir hannyń esimderiniń berilýine uiytqy boldy.
Óz kezeginde, aimaq basshysy Qyrymbek Kósherbaev Batys Qazaqstan oblysynyń azamattaryna kórsetken qurmet pen jumysyna bergen baǵa úshin alǵysyn bildirdi.
