Qazaqstan Respýblikasynyń Memlekettik hatshysy Qyrymbek Kósherbaev jumys saparymen Almaty qalasyna keldi. Ol qala ákimi Baqytjan Saǵyntaevpen birge Almatynyń ǵylymi jáne shyǵarmashylyq ziialy qaýym ókilderimen kezdesti. Kezdesýde Memleket basshysy Qasym-Jomart Toqaevtyń biylǵy «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynda jariia etilgen basym mindetter talqylandy.
Kezdesýdi ashqan Memlekettik hatshy Qazaqstan Prezidentiniń biylǵy Joldaýy pandemiia men jahandyq ekonomikalyq daǵdarys jaǵdaiyndaǵy Qazaqstannyń jańa áleýmettik-ekonomikalyq damý baǵyty ekenin atap ótti. Aldaǵy barlyq ózgerister memlekettiń jumys isteý tiimdiligin arttyrýǵa, ózekti áleýmettik-ekonomikalyq problemalardy sheshýge baǵyttalǵan.
Qyrymbek Kósherbaev qazirgidei kúrdeli kezeńde ziialy qaýym daǵdarystyq jaǵdailardyń aldyn alýda, halyqtyń jańa biregeiligin qalyptastyrýda ózindik ról atqarýy tiis ekenin atap ótti.
Bul rette jańa kezeńniń syn-qaterlerin eskere otyryp, birinshi kezekte, uly Abaidyń baǵa jetpes murasyn qaita zerdelep, ziialy qaýymnyń ulttyń jańa rýhani qasietterin qalyptastyrýdaǵy missiiasyn tereń túsiný qajet.
Tuńǵysh Prezident – Elbasy Nursultan Nazarbaev usynǵan "Rýhani jańǵyrý" baǵdarlamasyn iske asyrýda onyń mazmunyn baiytyp, serpin berý kerek. Mysaly, halyq dástúrleri men ádet-ǵuryptaryn saqtaý jáne qorǵaý máselelerin quqyqtyq retteý boiynsha ǵalymdar men qoǵam qairatkerlerinen turatyn jumys tobyn qurý qajet.
Daǵdarys kezindegi jáne bolashaqta ulttyń damýynyń negizi eń aldymen otbasy men otbasylyq tárbie bolýy kerek. Orta mektepterde otbasylyq qundylyqtarǵa baǵdarlanǵan arnaiy pánderdi engizýdi qarastyrýdyń, jastardy otbasylyq tárbieleýdiń jalpyulttyq ádistemesin ázirleýdiń ýaqyty keldi.
Ashyq pikir almasý jaǵdaiynda ótken kezdesýde belgili mádeniet jáne ǵylym qairatkerleri Orazaly Sábden, Smaǵul Elýbai, Murat Áýezov, Tóregeldi Sharmanov, Murat Jurynov, Rahman Alshanov, Asanáli Áshimov jáne basqa da azamattar ulttyń rýhani jańarýy týraly óz usynystarymen bólisti.
