Qyrǵyz Respýblikasynyń kúshtik, áskeri jáne quqyq qorǵaý qurylymdarynyń basshylary eldegi jaǵdaidy turaqtandyrýǵa baǵyttalǵan hattama qabyldady, dep habarlaidy Kabar agenttigi.
8 qazanda Qyrǵyz Respýblikasynyń Memlekettik ulttyq qaýipsizdik komiteti (MUQP) kollegiiasynyń zalynda Qyrǵyzstannyń Qaýipsizdik keńesiniń hatshysy mindetin atqarýshy, kúshtik qurylymdar men quqyq qorǵaý organdarynyń úilestirýshisi O.Sývanalievtyń tóraǵalyǵymen otyrys bolyp ótti. Bul týraly MUQP baspasóz qyzmeti habarlady.
Otyrysqa respýblikadaǵy Qaýipsizdik keńesiniń hatshylyǵy men kúshtik, áskeri jáne quqyq qorǵaý qurylymdarynyń basshylary qatysty.
Jiynda eldegi qoǵamdyq-saiasi ahýaldy turaqtandyrý máseleleri men azamattardy, qoǵam men memleketti qorǵaý úshin arnaiy qyzmet, quqyq qorǵaý organdary men Qarýly Kúshterdiń jumysyn jedel túrde úilestirý máseleleri talqylandy. Sonymen qatar Qyrǵyz Respýblikasynda bolyp jatqan syn-qaterler men qaýip-qaterlerge ýaqtyly den qoiý jáne memlekettik basqarý júiesin zańdy arnaǵa qaitarý máselesi pysyqtaldy.
O.Sývanalievtiń Qyrǵyz Respýblikasyndaǵy ahýal týraly aqparatyn tyńdaǵannan keiin jinalǵandar «2020 jyldyń 5 qazanyndaǵy oqiǵalarǵa bailanysty Qyrǵyz Respýblikasynda qaýipsizdik pen zańdylyqty qamtamasyz etý sharalary týraly» Hattamany qabyldady.
Hattama 12 tarmaqtan turady. Onda qaýipsizdik pen zańdylyqty qamtamasyz etýge baǵyttalǵan negizgi basymdyqtar bekitilgen.
Qyrǵyz Respýblikasynyń barlyq kúsh qurylymdary eldegi turaqtylyqty qamtamasyz etý úshin túsinistik tanytyp, birigýi kerek.
Sonymen qatar jeke quramnyń moraldyq-psihologiialyq jaǵdaiyn jaqsartý boiynsha qajetti sharalardy qabyldaý, jeke quramnyń ómiri men densaýlyǵynyń qorǵalýyn, sondai-aq qarý-jaraqtyń, oq-dárilerdiń, áskeri, arnaiy jáne ózge de tehnika men múliktiń saqtalýyn qamtamasyz etý máseleleri maquldandy.
Barlyq deńgeide, sonyń ishinde erikti halyq saqshylaryn tarta otyryp, naqty jáne jan-jaqty ózara árekettesýdi qamtamasyz etý mindeti kelisildi. Arnaiy sharalardy júrgizý barysynda fýnktsiialar, mindetter, ókilettikter men jaýapkershilik salalaryn naqty belgilei otyryp, turaqsyzdyqtyń yqtimal oshaqtarynda arnaiy is-sharalardyń biryńǵai birlesken josparyn ázirleý jáne qabyldaý kózdelip otyr.
Sondai-aq, hattamaǵa sáikes, eldegi qylmystyq ahýaldyń nasharlaýyna jol bermeý, qylmyskerlerdiń respýblikadaǵy túrli saiasi kúshterge yqpal etý áreketterin, memlekettik organdardy turaqsyzdandyrýǵa talpyný umtylystaryn qatań jolmen tyiý týraly sheshim qabyldandy. Qylmyskerler men uiymdasqan qylmystyq toptardyń áreketterin beitaraptandyrý, onyń ishinde zańsyz saqtalǵan qarý-jaraq pen oq-dárilerdi tárkileý boiynsha belsendi sharalar júrgizý josparlanýda. Qylmystyq-atqarý júiesi mekemelerindegi jaǵdaidyń turaqsyzdyǵyna jol bermeý jáne arnaiy kontingentke qylmystyq elementterdiń syrttan áserin boldyrmaý boiynsha sharalar qabyldaý jóninde ortaq sheshim jasaldy.
Strategiialyq jáne basqa da mańyzdy nysandardyń kúzetin kúsheitip, memlekettik jáne jeke menshik nysandardyń qaýipsizdigi qamtamasyz etiledi.
Destrýktivti sipattaǵy kúshterdiń eldegi qoǵamdyq-saiasi ahýaldy turaqsyzdandyrýǵa baǵyttalǵan barlyq áreketin, sonyń ishinde aimaqaralyq jáne etnosaralyq negizdegi arandatýshylyq áreketterdi, sondai-aq memlekettik organdardyń qyzmetine jáne jeke menshikke kedergi jasaý, ártúrli nysandardy ruqsatsyz basyp alý qimyldaryn jedel jáne qatań jolmen basý jospary maquldandy.
Eske salaiyq, jeksenbi, 4 qazan kúni Qyrǵyzstanda Jogorký Keneshke depýtattardy sailaý ótti. Depýtattyq mandatqa 16 partiia úmitkerlik etti. Daýys berýdiń aldyn ala málimeti boiynshy, 7% mejeni 4 partiia eńserdi.
Al, 5 qazan kúni sailaý nátijesine kóńili tolmaǵan bir top adam ortalyq alańda miting uiymdastyryp, odan keiin Aq úige bettedi. Olardy tarqatý úshin militsiia kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boiynsha, aýrýhanaǵa zardap shekken 16 adam jetkizilgen. Keiingi málimet boiynsha, zardap shekken adamdar sany 911-ge jetti.
Eldiń Ishki ister ministrligi mitingti uiymdastyrýshylar men partiia basshylaryn óz jaqtastaryn úilerine qaitarýǵa shaqyrdy.
Prezident Sooronbai Jeenbekov "saiasi kúshter bilikti basyp alýǵa árekettendi" dep málimdep, eldiń zańdy prezidenti bolyp qalǵanyn eskertti. Biraq ol dúisenbiden beri kópshilik aldyna shyqpaǵan. Bishkekte túrli saiasi kúshter arasynda bilikke talas qyzǵan.
